ആറ്റുകാല്‍ യുവതിയുടെ ആത്മഹത്യ: അമ്മയ്ക്ക് അയച്ച മര്‍ദനത്തിന്റെ ചിത്രങ്ങളും ചാറ്റുകളും പുറത്ത്

തിരുവനന്തപുരം: ആറ്റുകാലില്‍ യുവതി ആത്മഹത്യ ചെയ്ത സംഭവത്തില്‍ നിര്‍ണായക വിവരങ്ങള്‍ പുറത്തുവന്നു. മരിച്ച ആരതി അമ്മയ്ക്ക് അയച്ച ചാറ്റ് സന്ദേശങ്ങളും മര്‍ദനമേറ്റതിന്റെ ചിത്രങ്ങളുമാണ് ഇപ്പോള്‍ പുറത്തുവന്നിരിക്കുന്നത്. മുഖത്തും കൈകളിലും ശരീരത്തിന്റെ വിവിധ ഭാഗങ്ങളിലും പരിക്കേറ്റ നിലയിലുള്ള ചിത്രങ്ങള്‍ അമ്മയ്ക്ക് അയച്ചതായി ചാറ്റില്‍ വ്യക്തമാകുന്നു. 

അച്ഛനും ചിത്രങ്ങള്‍ അയച്ചുകൊടുത്തിട്ടുണ്ടെന്നും അദ്ദേഹം ഇത് കാണട്ടെയെന്നും ആരതി സന്ദേശത്തില്‍ പറയുന്നുണ്ട്. പരിക്കുകള്‍ ആശുപത്രിയില്‍ കാണിക്കണമെന്ന് അമ്മ നിര്‍ദേശിച്ചപ്പോള്‍, ഭര്‍ത്താവ് അതുലിന്റെ അമ്മ തൈലം പുരട്ടി തരാമെന്ന് പറഞ്ഞതായും അതുല്‍ ആശുപത്രിയില്‍ കൊണ്ടുപോകില്ലെന്നും ആരതി മറുപടി നല്‍കുന്നുണ്ട്. അനാവശ്യമായി ഒന്നും സംസാരിക്കരുതെന്നും എവിടെയും പോകരുതെന്നും വീട്ടില്‍ നിന്ന് നിര്‍ദേശമുണ്ടായതായും ചാറ്റില്‍ പറയുന്നു.

ഒന്നര വര്‍ഷം മുമ്പായിരുന്നു ആരതിയുടെയും അതുലിന്റെയും വിവാഹം. വിവാഹശേഷം ഇരുവരും വര്‍ക്കലയില്‍ വാടകവീട്ടില്‍ താമസിച്ചുവരികയായിരുന്നു. ഈ വീട്ടിലാണ് ആരതിയെ മരിച്ച നിലയില്‍ കണ്ടെത്തിയത്.

വിവാഹം കഴിഞ്ഞ് മൂന്നാം മാസം മുതല്‍ ആരതി ഭര്‍ത്തൃപീഡനം നേരിട്ടിരുന്നുവെന്നാണ് കുടുംബത്തിന്റെ ആരോപണം. ഭര്‍ത്താവ് ശാരീരികമായി ഉപദ്രവിച്ചതിന്റെ ചിത്രങ്ങളും ദൃശ്യങ്ങളും ആരതി അമ്മയ്ക്ക് അയച്ചിരുന്നുവെന്നും കുടുംബം പറയുന്നു.

വിവാഹസമയത്ത് നല്‍കിയ 50 പവന്‍ സ്വര്‍ണം അതുല്‍ വിവിധ ഘട്ടങ്ങളിലായി പണയംവെക്കുകയും പിന്നീട് ഏകദേശം എട്ട് ലക്ഷം രൂപയ്ക്ക് വിറ്റ് കാര്‍ വാങ്ങുകയും ചെയ്തതായി കുടുംബം ആരോപിച്ചു. ഇതുമായി ബന്ധപ്പെട്ട തര്‍ക്കങ്ങള്‍ ഇരുവരും തമ്മില്‍ പതിവായിരുന്നുവെന്നും, പിന്നീട് പണത്തിനായി അതുല്‍ ആരതിയെ തുടര്‍ച്ചയായി ഉപദ്രവിച്ചിരുന്നുവെന്നും കുടുംബം ആരോപിക്കുന്നു. സംഭവത്തില്‍ പൊലീസ് അന്വേഷണം തുടരുകയാണ്.