വീര്യം കുറഞ്ഞ മദ്യത്തിനല്ലേ നികുതി കുറച്ചത്, കൂടിയതിനല്ലല്ലോ?: സര്‍ക്കാര്‍ നിലപാട് ന്യായീകരിച്ച് മന്ത്രി കെ. മുരളീധരന്‍

തിരുവനന്തപുരം:  വീര്യം കുറഞ്ഞ മദ്യത്തിന് നികുതി ഇളവ് നല്‍കാനുള്ള സര്‍ക്കാര്‍ തീരുമാനത്തെ ന്യായീകരിച്ച് മന്ത്രി കെ. മുരളീധരന്‍. ബജറ്റ് നിര്‍ദേശം ധനബില്ലില്‍ ഉള്‍പ്പെടുത്തി തന്നെ മുന്നോട്ട് പോകുമെന്നും, ബില്‍ പാസായാല്‍ നടപ്പിലാക്കുന്ന കാര്യത്തില്‍ യുഡിഎഫുമായി ചര്‍ച്ച നടത്തി അന്തിമ തീരുമാനമെടുക്കുമെന്നും അദ്ദേഹം വ്യക്തമാക്കി.വീര്യം കുറഞ്ഞ മദ്യത്തിനല്ലേ നികുതി കുറച്ചത്, വീര്യം കൂടിയതിനല്ലല്ലോ എന്ന് ചോദിച്ച മന്ത്രി, സര്‍ക്കാരിന്റെ ഉദ്ദേശം സദുദ്ദേശപരമാണെന്ന് ആവര്‍ത്തിച്ചു.

സമ്പൂര്‍ണ്ണ മദ്യനിരോധനത്തിലേക്ക് എത്താനുള്ള സാഹചര്യം നിലവില്‍ കേരളത്തിലില്ലെന്നും അദ്ദേഹം കൂട്ടിച്ചേര്‍ത്തു.ശബരിമല കേസില്‍ എസ്‌ഐടി റിപ്പോര്‍ട്ടിന്റെ അടിസ്ഥാനത്തില്‍ കര്‍ശന നടപടി സ്വീകരിക്കുമെന്നും മുരളീധരന്‍ ഉറപ്പുനല്‍കി. സ്വര്‍ണ്ണ കൊള്ളയെക്കുറിച്ച് വിമര്‍ശിക്കുന്നവര്‍ അയോധ്യയിലെ സ്വര്‍ണ്ണാഭരണ മോഷണത്തെക്കുറിച്ച് കൂടി പ്രതികരിക്കണമെന്ന് അദ്ദേഹം ആവശ്യപ്പെട്ടു.

സംസ്ഥാനത്തെ പകര്‍ച്ചവ്യാധി വ്യാപനം നിയന്ത്രണവിധേയമാണെന്നും ഷിഗെല്ല കേസുകള്‍ കുറയുന്നുണ്ടെന്നും മന്ത്രി അറിയിച്ചു. ഡെങ്കിപ്പനി ഭീഷണിയും നിയന്ത്രണത്തിലാണ്. മഴ കനക്കുന്ന സാഹചര്യത്തില്‍ മാലിന്യ നിര്‍മാര്‍ജനം പ്രധാനമാണെന്ന് ഓര്‍മ്മിപ്പിച്ച മന്ത്രി, ബോധവല്‍ക്കരണത്തിനായി മറ്റന്നാള്‍ തിരുവനന്തപുരത്ത് മന്ത്രിമാരുടെ നേതൃത്വത്തില്‍ സംയുക്ത പ്രതിജ്ഞാ പരിപാടി സംഘടിപ്പിക്കുമെന്നും അറിയിച്ചു.