കേരളത്തില്‍ അതിതീവ്ര മഴയ്ക്ക് സാധ്യത; ജൂലൈ ഒന്ന് മഴ കനക്കും

തിരുവനന്തപുരം:   സംസ്ഥാനത്ത് ഒരിടവേളയ്ക്ക് ശേഷം വീണ്ടും അതിതീവ്ര മഴയ്ക്കുള്ള സാധ്യത പ്രവചിച്ച് കേന്ദ്ര കാലാവസ്ഥ വകുപ്പ് എല്ലാ ജില്ലകളിലും മുന്നറിയിപ്പ് പുറപ്പെടുവിച്ചു. കോഴിക്കോട്, വയനാട്, കണ്ണൂര്‍, കാസര്‍ഗോഡ് എന്നീ വടക്കന്‍ ജില്ലകളില്‍ അതീവ ജാഗ്രതയുടെ ഭാഗമായി ഓറഞ്ച് അലര്‍ട്ട് പ്രഖ്യാപിച്ചപ്പോള്‍, തിരുവനന്തപുരം മുതല്‍ മലപ്പുറം വരെയുള്ള മറ്റു ജില്ലകളില്‍ മഞ്ഞ അലര്‍ട്ടാണ് നിലവിലുള്ളത്. 

വരും ദിവസങ്ങളില്‍ അടുത്ത മാസം ഒന്നാം തീയതി വരെ ഇതേ ശക്തിയില്‍ കനത്ത മഴ തുടരുമെന്നാണ് റിപ്പോര്‍ട്ട്. മോശം കാലാവസ്ഥയെ തുടര്‍ന്ന് കര്‍ണാടക, ലക്ഷദ്വീപ് തീരങ്ങളില്‍ മത്സ്യബന്ധനത്തിന് കര്‍ശന വിലക്കേര്‍പ്പെടുത്തിയിട്ടുണ്ടെങ്കിലും കേരളതീരത്ത് നിലവില്‍ മീന്‍പിടുത്തം തുടരാവുന്നതാണ്. എങ്കിലും കള്ളക്കടല്‍ പ്രതിഭാസത്തിന്റെ ഭാഗമായി തീരമേഖലകളില്‍ ഉയര്‍ന്ന തിരമാലകള്‍ക്ക് സാധ്യതയുള്ളതിനാല്‍ ജാഗ്രത പാലിക്കണം. മഴയ്ക്കൊപ്പം ശക്തമായ കാറ്റിനും മനുഷ്യരുടെയും വളര്‍ത്തുമൃഗങ്ങളുടെയും ജീവനും വൈദ്യുത-ആശയവിനിമയ ശൃംഖലകള്‍ക്കും കടുത്ത നാശനഷ്ടം വരുത്തുന്ന ഇടിമിന്നലിനും സാധ്യതയുള്ളതിനാല്‍, കാര്‍മേഘം കണ്ടുതുടങ്ങുന്ന സമയം മുതല്‍ തന്നെ പൊതുജനങ്ങള്‍ ആവശ്യമായ എല്ലാ സുരക്ഷാ മുന്‍കരുതലുകളും നിര്‍ബന്ധമായും സ്വീകരിക്കണമെന്ന് കാലാവസ്ഥ വകുപ്പ് കര്‍ശന നിര്‍ദേശം നല്‍കിയിട്ടുണ്ട്.