പിറവത്ത് കുടുംബത്തെ പുഴയില്‍ കാണാതായ സംഭവം; ആറ് വയസുകാരിയുടെ മൃതദേഹം കണ്ടെത്തി

എറണാകുളം: പിറവം മൂവാറ്റുപുഴയാറില്‍ ഒരു കുടുംബത്തെ പുഴയില്‍ കാണാതായ സംഭവത്തില്‍ ആറ് വയസുകാരിയുടെ മൃതദേഹം കണ്ടെത്തി. ഇന്ന് രാവിലെ ഫയര്‍ഫോഴ്‌സും പോലീസും ചേര്‍ന്ന് നടത്തിയ വിപുലമായ തിരച്ചിലിലാണ് എക്‌സൈസ് കടവിനു സമീപമുള്ള ഐ.എന്‍.ടി.യു.സി കടവില്‍ നിന്ന് കുട്ടിയുടെ മൃതദേഹം കണ്ടെടുത്തത്. ഇതോടെ പുഴയില്‍ കാണാതായ നാലുപേരുടെയും മൃതദേഹങ്ങള്‍ വീണ്ടെടുത്തു. 

കോതമംഗലം സ്വദേശിയായ നാരായണന്‍ (43), ഭാര്യ വിജിമോള്‍ (40), ഇവരുടെ രണ്ടു വയസ്സുകാരനായ മകന്‍, ആറ് വയസുകാരിയായ മകള്‍ ഹന്ന മോള്‍ എന്നിവരാണ് മരണപ്പെട്ടത്. കടുത്ത സാമ്പത്തിക പ്രതിസന്ധിയെത്തുടര്‍ന്ന് കുടുംബം മൂവാറ്റുപുഴയാറ്റില്‍ ചാടി കൂട്ടആത്മഹത്യ ചെയ്തതാണെന്നാണ് പോലീസിന്റെ പ്രാഥമിക നിഗമനം.

കഴിഞ്ഞ വെള്ളിയാഴ്ച വൈകുന്നേരത്തോടെ പുഴയിലൂടെ മൃതദേഹങ്ങള്‍ ഒഴുകിവരുന്നത് കണ്ട് നാട്ടുകാരാണ് പോലീസിനെ വിവരമറിയിക്കുന്നത്. ആദ്യഘട്ടത്തില്‍ അമ്മയുടെയും ഇളയ മകന്റെയും മൃതദേഹങ്ങളാണ് നാട്ടുകാര്‍ കണ്ടെത്തുന്നത്; തുടര്‍ന്ന് നടത്തിയ അന്വേഷണത്തിലാണ് ശനിയാഴ്ച നാരായണന്റെ മൃതദേഹം ലഭിക്കുന്നത്. ഇവര്‍ക്കൊപ്പം ഒരു പെണ്‍കുട്ടി കൂടി ഉണ്ടായിരുന്നു എന്ന വിവരത്തെ തുടര്‍ന്ന് അഗ്‌നിരക്ഷാസേന നടത്തിയ മൂന്ന് ദിവസം നീണ്ട തിരച്ചിലിനൊടുവിലാണ് ഇന്ന് രാവിലെ കുട്ടിയുടെ മൃതദേഹം കരയ്ക്കടുപ്പിച്ചത്. 

കോതമംഗലത്ത് വാടകയ്ക്ക് താമസിക്കുകയായിരുന്ന ഈ കുടുംബം കടുത്ത ദാരിദ്ര്യത്തിലും സാമ്പത്തിക ബുദ്ധിമുട്ടിലുമായിരുന്നുവെന്ന് പോലീസ് വ്യക്തമാക്കുന്നു. മരിച്ച മാതാപിതാക്കളുടെയും രണ്ട് വയസ്സുകാരന്റെയും ഇന്‍ക്വസ്റ്റ്, പോസ്റ്റ്മോര്‍ട്ടം നടപടികള്‍ നേരത്തെ തന്നെ പൂര്‍ത്തിയായിരുന്നു. സംഭവത്തില്‍ പിറവം പോലീസ് അസ്വാഭാവിക മരണത്തിന് കേസെടുത്ത് അന്വേഷണം ഊര്‍ജിതമാക്കിയിട്ടുണ്ട്.