മുഖ്യമന്ത്രി പ്രഖ്യാപനം വൈകാതെ; കെ സി വേണുഗോപാലിന് മുന്‍തൂക്കം

ദില്ലി: കേരളത്തിലെ മുഖ്യമന്ത്രി പ്രഖ്യാപനം അന്തിമഘട്ടത്തിലേക്ക് നീങ്ങുന്നതിനിടെ കെ.സി. വേണുഗോപാലിന് മുന്‍തൂക്കം ലഭിച്ചതായി സൂചന. കോണ്‍ഗ്രസ് ഹൈക്കമാന്‍ഡിന്റെ നേതൃത്വത്തില്‍ നടക്കുന്ന ചര്‍ച്ചകളില്‍ അദ്ദേഹത്തിനാണ് നിലവില്‍ മുന്‍ഗണന ലഭിക്കുന്നതെന്നാണ് വിവരം. മുഖ്യമന്ത്രിയുടെ പ്രഖ്യാപനം ഇന്നോ നാളെയോ ഉണ്ടാകാമെന്നാണു സൂചനകള്‍.

ഇതിനായുള്ള നടപടികള്‍ ഹൈക്കമാന്‍ഡ് വേഗത്തിലാക്കിയിട്ടുണ്ട്. മുഖ്യമന്ത്രിയെ പ്രഖ്യാപിക്കുന്നത് കേരളത്തിലോ ദില്ലിയിലോ എന്നതില്‍ ഇപ്പോഴും ചര്‍ച്ച തുടരുന്നു. കേരളത്തിലാണെങ്കില്‍ നിയമസഭാകക്ഷിയോഗം വിളിച്ച് പ്രഖ്യാപിക്കാനാണ് സാധ്യത. ദില്ലിയിലാണെങ്കില്‍ കോണ്‍ഗ്രസ് അധ്യക്ഷന്‍ മല്ലിഖാര്‍ജുന്‍ ഖാര്‍ഗെയോ രാഹുല്‍ ഗാന്ധിയോ പ്രഖ്യാപനം നടത്താനിടയുണ്ട്.

കഴിഞ്ഞ രാത്രി രാഹുല്‍ ഗാന്ധിയും മല്ലിഖാര്‍ജുന്‍ ഖാര്‍ഗെയും തമ്മില്‍ ചര്‍ച്ചകള്‍ നടന്നതായും വിവരമുണ്ട്. സോണിയാ ഗാന്ധിയുമായി ചില ഔപചാരിക ചര്‍ച്ചകള്‍ മാത്രമാണ് ഇനി ബാക്കിയുള്ളത്. ഘടകകക്ഷികള്‍ക്കും ഈ തീരുമാനത്തോട് വലിയ എതിര്‍പ്പ് ഉണ്ടാകില്ലെന്നാണ് ഹൈക്കമാന്‍ഡ് വിലയിരുത്തുന്നത്. കോണ്‍ഗ്രസിന് അവരുടെ മുഖ്യമന്ത്രി തീരുമാനിക്കാമെന്ന നിലപാട് ഘടകകക്ഷികള്‍ അറിയിച്ചതായും സൂചനയുണ്ട്.