കാട്ടാക്കട കെഎസ്ആര്‍ടിസി ഡിപ്പോയില്‍ മാനസിക വെല്ലുവിളി നേരിടുന്ന സ്ത്രീയെ പീഡിപ്പിച്ച സംഭവം; കേസെടുത്ത് പൊലീസ്

തിരുവനന്തപുരം:  കാട്ടാക്കട കെഎസ്ആര്‍ടിസി ഡിപ്പോയില്‍ മാനസിക വെല്ലുവിളി നേരിടുന്ന സ്ത്രീയെ പീഡിപ്പിച്ച സംഭവത്തില്‍ പൊലീസ് കേസെടുത്തു. സ്ത്രീയുടെ മൊഴിയുടെ അടിസ്ഥാനത്തില്‍ ലൈംഗികാതിക്രമത്തിനാണ് കേസെടുത്തിരിക്കുന്നത്. കഴിഞ്ഞ ദിവസം രാത്രി ഒന്നരയോടെ ഡിപ്പോയില്‍ ഉറങ്ങുകയായിരുന്ന സ്ത്രീക്ക് നേരെയാണ് അതിക്രമം ഉണ്ടായത്. സ്റ്റേഷന്‍ മാസ്റ്ററുടെ ഓഫീസിന് സമീപം നടന്ന സംഭവം ശ്രദ്ധയില്‍പ്പെട്ട ജീവനക്കാര്‍ ഉടന്‍ തന്നെ കാട്ടാക്കട പൊലീസിനെ വിവരമറിയിക്കുകയായിരുന്നു.

നിലവില്‍ ഷെല്‍ട്ടര്‍ ഹോമിലേക്ക് മാറ്റിയ സ്ത്രീയെ മനോരോഗ വിദഗ്ധന്റെ സാന്നിധ്യത്തിലാണ് പൊലീസ് മൊഴി രേഖപ്പെടുത്തിയത്. ഞായറാഴ്ച രാവിലെ ഇവരെ വൈദ്യപരിശോധനയ്ക്കും കൗണ്‍സിലിംഗിനും വിധേയമാക്കി. സംഭവത്തിന് ശേഷം ഒളിവില്‍ പോയ പ്രതി ബ്രൂസ്ലി ഷിബുവിനായി പൊലീസ് തിരച്ചില്‍ ഊര്‍ജിതമാക്കിയിട്ടുണ്ട്. പ്രതിയെ കുറിച്ച് ചില സൂചനകള്‍ ലഭിച്ചിട്ടുണ്ടെന്നും ഉടന്‍ തന്നെ പിടിയിലാകുമെന്നും അന്വേഷണ ഉദ്യോഗസ്ഥര്‍ അറിയിച്ചു.

അതേസമയം, ഡിപ്പോയിലെ സുപ്രധാന സിസിടിവി ദൃശ്യങ്ങള്‍ ചോര്‍ന്ന സംഭവത്തില്‍ കെഎസ്ആര്‍ടിസി ആഭ്യന്തര അന്വേഷണം ആരംഭിച്ചിട്ടുണ്ട്. അതീവ സുരക്ഷിതമായി സൂക്ഷിക്കേണ്ട ദൃശ്യങ്ങള്‍ പുറത്തുപോയത് ഗുരുതരമായ വീഴ്ചയായാണ് മാനേജ്മെന്റ് കാണുന്നത്. സ്ത്രീ സുരക്ഷയുമായി ബന്ധപ്പെട്ട ഇത്തരമൊരു വിഷയത്തില്‍ ദൃശ്യങ്ങള്‍ പ്രചരിച്ചത് ഇരയുടെ സ്വകാര്യതയെ ബാധിക്കുമെന്ന ആശങ്കയും ഉയര്‍ന്നിട്ടുണ്ട്. വരും ദിവസങ്ങളില്‍ പൊലീസിനൊപ്പം കെഎസ്ആര്‍ടിസിയും കര്‍ശനമായ തുടര്‍നടപടികളിലേക്ക് നീങ്ങാനാണ് സാധ്യത.