കനത്ത തോല്‍വിയിലും ആത്മപരിശോധനയില്ല: സിപിഐഎം വിലയിരുത്തലില്‍ ഭരണപരാജയങ്ങളെക്കുറിച്ച് പരാമര്‍ശമില്ല

കനത്ത തെരഞ്ഞെടുപ്പ് തോല്‍വിക്ക് പിന്നാലെ നടത്തിയ സിപിഐഎം വിലയിരുത്തലില്‍ ഭരണപരാജയങ്ങളെ കുറിച്ച് പരാമര്‍ശമില്ല. പരാജയത്തിന് പ്രധാന കാരണം ന്യൂനപക്ഷ വോട്ടുകള്‍ യുഡിഎഫിന് അനുകൂലമായതും വിമതരുടെ വഞ്ചനയുമാണെന്നാണ് പാര്‍ട്ടിയുടെ കണ്ടെത്തല്‍.

പാര്‍ട്ടിയുടെ ശക്തികേന്ദ്രങ്ങളിലുപോലും തിരിച്ചടി നേരിട്ടതായും റിപ്പോര്‍ട്ടില്‍ പറയുന്നു. വിമതര്‍ നടത്തിയ നീക്കങ്ങള്‍ ആസൂത്രിതമായതാണെന്നും അവരുടെ വിജയത്തിന് വ്യത്യസ്ത കാരണങ്ങളുണ്ടെന്നും വിലയിരുത്തലില്‍ ചൂണ്ടിക്കാട്ടുന്നു. അതേസമയം, പാര്‍ട്ടി വോട്ടുകള്‍ ബിജെപിയിലേക്ക് ചോര്‍ന്നിട്ടില്ലെന്നും സംസ്ഥാന ഘടകം വ്യക്തമാക്കുന്നു.

ബംഗാളിലെ സാഹചര്യങ്ങള്‍ വിലയിരുത്തിയപ്പോള്‍, എസ്ഐആര്‍ നടപടികള്‍ ബിജെപിയുടെ വിജയത്തിന് കാരണമായതായി പാര്‍ട്ടി അഭിപ്രായപ്പെട്ടു. ഭരണവിരുദ്ധ വികാരം ബിജെപിക്ക് മുതലാക്കാന്‍ കഴിഞ്ഞതായും ബംഗാള്‍ ഘടകം വിലയിരുത്തുന്നു. ന്യൂനപക്ഷ വോട്ടുകള്‍ തിരിച്ചുപിടിക്കാന്‍ സാധിക്കുമെന്ന ആത്മവിശ്വാസവും അവര്‍ പ്രകടിപ്പിച്ചു.

ഇതിനിടെ, പ്രതിപക്ഷ നേതൃസ്ഥാനം ഏറ്റെടുക്കുമോ എന്ന മാധ്യമപ്രവര്‍ത്തകരുടെ ചോദ്യത്തിന് പിണറായി വിജയന്‍ ചിരിയിലൊതുക്കി മറുപടി നല്‍കി. ഡല്‍ഹിയില്‍ നടക്കുന്ന നിര്‍ണായക പൊളിറ്റ് ബ്യൂറോ യോഗം തുടരുകയാണ്.