ഇനിയും കാത്തിരിക്കണം, കേരള മുഖ്യമന്ത്രി തീരുമാനം വൈകുന്നു; സോണിയ ഗാന്ധിയുടെ നിലപാട് നിര്‍ണായകം

തിരുവനന്തപുരം: കേരളത്തില്‍ പുതിയ മുഖ്യമന്ത്രിയെ നിശ്ചയിക്കുന്നതിനെ ചൊല്ലിയുള്ള അനിശ്ചിതത്വം തുടരുന്നു. കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ കര്‍ണാടകയില്‍ തുടരുന്നതിനാലാണ് പ്രഖ്യാപനം വൈകുന്നത്. മുതിര്‍ന്ന നേതാക്കളായ കെ.സി. വേണുഗോപാല്‍, വി.ഡി. സതീശന്‍, രമേശ് ചെന്നിത്തല എന്നിവര്‍ മുഖ്യമന്ത്രി സ്ഥാനത്തിനായി ഉറച്ചുനില്‍ക്കുന്നത് പാര്‍ട്ടിക്കുള്ളില്‍ വലിയ പ്രതിസന്ധിയാണ് സൃഷ്ടിച്ചിരിക്കുന്നത്. എംഎല്‍എമാരുടെ പിന്തുണ കെ.സി. വേണുഗോപാലിനാണെങ്കിലും, സംസ്ഥാനത്തെ രാഷ്ട്രീയ സാഹചര്യം പരിഗണിച്ച് വി.ഡി. സതീശനെ പിന്തുണയ്ക്കുന്ന നിലപാടാണ് മുസ്ലിം ലീഗ് സ്വീകരിച്ചിരിക്കുന്നത്.

ഹൈക്കമാന്‍ഡ് മുന്നോട്ടുവെച്ച ഒത്തുതീര്‍പ്പ് ഫോര്‍മുലകള്‍ പലതും നിലവില്‍ ഫലം കണ്ടിട്ടില്ല. കെ.സി. വേണുഗോപാല്‍ മുഖ്യമന്ത്രിയാവുകയും മറ്റുള്ളവര്‍ക്ക് പ്രധാന വകുപ്പുകള്‍ നല്‍കുകയും ചെയ്യുക എന്നതായിരുന്നു കേന്ദ്ര നേതൃത്വത്തിന്റെ പ്ലാന്‍. എന്നാല്‍, വേണുഗോപാല്‍ മുഖ്യമന്ത്രിയായാല്‍ ഉണ്ടാകുന്ന ഉപതെരഞ്ഞെടുപ്പുകളില്‍ സഹകരിക്കില്ലെന്ന് മുസ്ലിം ലീഗ് വ്യക്തമാക്കിയത് കോണ്‍ഗ്രസിനെ പ്രതിരോധത്തിലാക്കിയിട്ടുണ്ട്. പ്രിയങ്ക ഗാന്ധിയുടെ വിജയത്തില്‍ ലീഗിന്റെ പങ്ക് നിര്‍ണായകമായ സാഹചര്യത്തില്‍ അവരെ പിണക്കിക്കൊണ്ടുള്ള ഒരു നീക്കത്തിന് ഹൈക്കമാന്‍ഡ് മുതിരാന്‍ സാധ്യത കുറവാണ്.

തെരഞ്ഞെടുപ്പ് ഫലം വന്ന് ഒരാഴ്ച പിന്നിട്ടിട്ടും തീരുമാനമാകാത്തതില്‍ ഘടകകക്ഷികള്‍ക്കിടയിലും അണികള്‍ക്കിടയിലും കടുത്ത അതൃപ്തിയുണ്ട്. എങ്കിലും മൂന്ന് നേതാക്കളും ശുഭപ്രതീക്ഷയിലാണ്. വി.ഡി. സതീശന്‍ തന്റെ ഭരണപരിചയത്തിലും ഉപതെരഞ്ഞെടുപ്പുകളിലെ വിജയങ്ങളിലും ആത്മവിശ്വാസം പ്രകടിപ്പിക്കുമ്പോള്‍, ഭൂരിപക്ഷം എംഎല്‍എമാരുടെ പിന്തുണ തനിക്കാണെന്ന് വേണുഗോപാലും, സീനിയോറിറ്റി പരിഗണിക്കപ്പെടുമെന്ന് ചെന്നിത്തലയും വിശ്വസിക്കുന്നു. എന്നാല്‍ 15-ാം കേരള നിയമസഭയുടെ കാലാവധി അവസാനിക്കാന്‍ ദിവസങ്ങള്‍ മാത്രം ബാക്കി നില്‍ക്കെ അടിയന്തര തീരുമാനം അനിവാര്യമാണ്.

ദേശീയതലത്തില്‍ ഈ കാലതാമസം പാര്‍ട്ടിയുടെ പ്രതിച്ഛായയെ ബാധിക്കുന്നതായാണ് ഹൈക്കമാന്‍ഡ് വിലയിരുത്തല്‍. തമിഴ്നാട്ടിലും ബംഗാളിലും ഭരണം സുഗമമായി മുന്നോട്ട് പോകുമ്പോള്‍ കേരളത്തിലെ അനിശ്ചിതത്വം രാഷ്ട്രീയ എതിരാളികള്‍ ആയുധമാക്കുന്നുണ്ട്. ഈ സാഹചര്യത്തില്‍ അച്ചടക്ക ലംഘനം നടത്തുന്നവര്‍ക്കെതിരെ കര്‍ശന നടപടി ഉണ്ടാകുമെന്ന് ഹൈക്കമാന്‍ഡ് മുന്നറിയിപ്പ് നല്‍കിയിട്ടുണ്ട്. ഇന്ന് വൈകിട്ടോ നാളെയോ സോണിയാ ഗാന്ധിയും രാഹുല്‍ ഗാന്ധിയും ഉള്‍പ്പെടുന്ന ഉന്നതതല ചര്‍ച്ചകള്‍ക്ക് ശേഷം അന്തിമ പ്രഖ്യാപനം ഉണ്ടായേക്കും.