മുഖ്യമന്ത്രി ചര്‍ച്ചകള്‍ പൂര്‍ത്തിയായി; ഹൈക്കമാന്‍ഡ് തീരുമാനം അറിയിക്കും: രമേശ് ചെന്നിത്തല

കേരളത്തിന്റെ അടുത്ത മുഖ്യമന്ത്രി ആരാകണമെന്ന ചര്‍ച്ചകള്‍ പൂര്‍ത്തിയായതായി കോണ്‍ഗ്രസ് നേതാവ് രമേശ് ചെന്നിത്തല വ്യക്തമാക്കി. തീരുമാനം വൈകിയിട്ടില്ലെന്നും ഹൈക്കമാന്‍ഡിന്റെ അന്തിമ തീരുമാനത്തിനായി കാത്തിരിക്കുകയാണെന്നും അദ്ദേഹം പറഞ്ഞു.

കോണ്‍ഗ്രസ് ഹൈക്കമാന്‍ഡ് എടുക്കുന്ന ഏതൊരു തീരുമാനവും കേരളത്തിലെ എല്ലാ പ്രവര്‍ത്തകരും അംഗീകരിക്കുമെന്നുറപ്പുണ്ടെന്ന് ചെന്നിത്തല പറഞ്ഞു. പാര്‍ട്ടിക്ക് പറയാനുള്ള കാര്യങ്ങള്‍ എല്ലാം ഹൈക്കമാന്‍ഡിനെ അറിയിച്ചിട്ടുണ്ടെന്നും ഇനി തീരുമാനം മാത്രം വന്നാല്‍ മതിയെന്നും അദ്ദേഹം കൂട്ടിച്ചേര്‍ത്തു.

ഇനി കൂടുതല്‍ ചര്‍ച്ചകള്‍ക്ക് ആവശ്യമില്ലെന്നും എല്ലാ ചര്‍ച്ചകളും ഇതിനകം പൂര്‍ത്തിയായെന്നും ചെന്നിത്തല വ്യക്തമാക്കി. സാമൂഹ്യമാധ്യമങ്ങളില്‍ അനാവശ്യ പ്രതികരണങ്ങള്‍ ഒഴിവാക്കണമെന്ന് പ്രവര്‍ത്തകര്‍ക്ക് നിര്‍ദേശം നല്‍കിയിരുന്നുവെന്നും അത് നടപ്പിലായെന്നാണ് തന്റെ വിശ്വാസമെന്നും അദ്ദേഹം പറഞ്ഞു.

കഴിഞ്ഞ തവണ എല്‍ഡിഎഫ് സര്‍ക്കാര്‍ രൂപീകരണത്തിന് എടുത്ത സമയം ചൂണ്ടിക്കാട്ടിയ ചെന്നിത്തല, അതിനേക്കാള്‍ കുറഞ്ഞ സമയമാണ് കോണ്‍ഗ്രസ് എടുക്കുന്നതെന്നും ഇത് ജനാധിപത്യ പ്രക്രിയയുടെ ഭാഗമാണെന്നും വ്യക്തമാക്കി. തീരുമാനം വന്നാല്‍ എല്ലാവരും ഒന്നിച്ച് അത് നടപ്പാക്കുമെന്നും അദ്ദേഹം കൂട്ടിച്ചേര്‍ത്തു.