ജീവിതശൈലിയില്‍ മാറ്റം വരുത്തണം; രാജ്യത്തെ ജനങ്ങളോടുള്ള മോദിയുടെ ഏഴ് നിര്‍ദേശങ്ങള്‍ ഇവ

ന്യൂഡല്‍ഹി: ആഗോള സാമ്പത്തിക പ്രതിസന്ധിയും പശ്ചിമേഷ്യയിലെ യുദ്ധസാഹചര്യവും കണക്കിലെടുത്ത് രാജ്യത്തെ ജനങ്ങള്‍ ജീവിതശൈലിയില്‍ മാറ്റം വരുത്തണമെന്ന് ആഹ്വാനം ചെയ്ത് പ്രധാനമന്ത്രി നരേന്ദ്ര മോദി. അന്താരാഷ്ട്ര വിപണിയില്‍ അസംസ്‌കൃത എണ്ണവില കുതിച്ചുയരുന്ന പശ്ചാത്തലത്തില്‍, രാജ്യത്തിന്റെ വിദേശനാണ്യ ശേഖരം സംരക്ഷിക്കുന്നതിനായി ഏഴ് നിര്‍ദേശങ്ങളാണ് പ്രധാനമന്ത്രി മുന്നോട്ടുവെച്ചത്. വര്‍ക്ക് ഫ്രം ഹോം രീതിക്ക് മുന്‍ഗണന നല്‍കുക, ഒരു വര്‍ഷത്തേക്ക് സ്വര്‍ണം വാങ്ങുന്നത് ഒഴിവാക്കുക, വിദേശ യാത്രകളും വിദേശത്തെ വിവാഹാഘോഷങ്ങളും നിയന്ത്രിക്കുക എന്നിവ ഇതില്‍ പ്രധാനമാണ്.

ഇന്ധന ഉപയോഗം കുറയ്ക്കുന്നതിനായി പൊതുഗതാഗത സംവിധാനങ്ങളും ഇലക്ട്രിക് വാഹനങ്ങളും ഉപയോഗിക്കണമെന്നും കാര്‍ പൂളിങ് പോലുള്ള രീതികള്‍ പ്രോത്സാഹിപ്പിക്കണമെന്നും അദ്ദേഹം അഭ്യര്‍ത്ഥിച്ചു. ഇറക്കുമതി ചെലവ് കുറയ്ക്കുന്നതിനായി പാചക എണ്ണയുടെ ഉപയോഗം കുറയ്ക്കുക, രാസവളങ്ങള്‍ക്ക് പകരം ജൈവകൃഷി രീതികള്‍ സ്വീകരിക്കുക, വിദേശ ബ്രാന്‍ഡുകള്‍ക്ക് പകരം സ്വദേശി ഉല്‍പ്പന്നങ്ങള്‍ തിരഞ്ഞെടുക്കുക തുടങ്ങിയ നിര്‍ദേശങ്ങളും പ്രധാനമന്ത്രി നല്‍കി. രാജ്യത്തിന്റെ സാമ്പത്തിക ഭദ്രതയ്ക്കായി ജനങ്ങളുടെ കൂട്ടായ പങ്കാളിത്തം അത്യാവശ്യമാണെന്ന് അദ്ദേഹം ഓര്‍മ്മിപ്പിച്ചു.

അതേസമയം, പ്രധാനമന്ത്രിയുടെ ആഹ്വാനത്തിനെതിരെ കടുത്ത വിമര്‍ശനവുമായി പ്രതിപക്ഷം രംഗത്തെത്തിയിട്ടുണ്ട്. സര്‍ക്കാരിന്റെ സാമ്പത്തിക നയങ്ങളിലെ പരാജയം മൂലം ഉണ്ടായ വിദേശനാണ്യ പ്രതിസന്ധിയുടെ ഭാരം ജനങ്ങളുടെ മേല്‍ കെട്ടിവെക്കാനുള്ള ശ്രമമാണിതെന്ന് വിമര്‍ശകര്‍ ആരോപിക്കുന്നു. എന്നാല്‍, ആഗോളതലത്തിലെ വിതരണ ശൃംഖലയിലുണ്ടായ തടസ്സങ്ങളും വിലക്കയറ്റവും നേരിടാന്‍ ഇത്തരം മുന്‍കരുതലുകള്‍ അനിവാര്യമാണെന്നാണ് കേന്ദ്ര സര്‍ക്കാരിന്റെ വിശദീകരണം.