മുഴുവന്‍സമയ കെപിസിസി അധ്യക്ഷന്‍ വേണം; ഹൈക്കമാന്‍ഡ് വേഗത്തില്‍ തീരുമാനമെടുക്കണമെന്ന് സണ്ണി ജോസഫ്

തിരുവനന്തപുരം: കെപിസിസിക്ക് മുഴുവന്‍സമയ പ്രസിഡന്റ് വേണമെന്ന ആവശ്യം ശക്തമാകുന്നതിനിടെ, വിഷയത്തില്‍ നിലപാട് വ്യക്തമാക്കി മന്ത്രിയും നിലവിലെ കെപിസിസി പ്രസിഡന്റുമായ സണ്ണി ജോസഫ്. മന്ത്രിസ്ഥാനവും കെപിസിസി അധ്യക്ഷസ്ഥാനവും ഒരുമിച്ച് മുന്നോട്ടുകൊണ്ടുപോകുന്നത് പ്രയാസകരമാണെന്നും, അധ്യക്ഷസ്ഥാനത്തെക്കുറിച്ച് എഐസിസി ഹൈക്കമാന്‍ഡ് എത്രയും വേഗം തീരുമാനമെടുക്കണമെന്നാണ് തന്റെ ആഗ്രഹമെന്നും അദ്ദേഹം പറഞ്ഞു.

വൈദ്യുതി മന്ത്രിയെന്ന നിലയിലും കെപിസിസി പ്രസിഡന്റെന്ന നിലയിലും രണ്ട് സുപ്രധാന ചുമതലകളാണ് നിര്‍വഹിക്കുന്നതെന്ന് സണ്ണി ജോസഫ് വ്യക്തമാക്കി. വൈദ്യുതി മേഖലയിലെ വെല്ലുവിളികള്‍ കൂടി കണക്കിലെടുക്കുമ്പോള്‍ മന്ത്രിസ്ഥാനത്തില്‍ കൂടുതല്‍ ശ്രദ്ധ കേന്ദ്രീകരിക്കേണ്ട സാഹചര്യമാണുള്ളതെന്നും അദ്ദേഹം പറഞ്ഞു. പാര്‍ട്ടി പുനഃസംഘടനയാണ് ഇതിന് പരിഹാരമെന്നും, എഐസിസി ഉചിതസമയത്ത് ഇക്കാര്യത്തില്‍ തീരുമാനമെടുക്കുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേര്‍ത്തു.

അതേസമയം, മുഴുവന്‍സമയ കെപിസിസി അധ്യക്ഷനെ നിയമിക്കണമെന്ന മുതിര്‍ന്ന കോണ്‍ഗ്രസ് നേതാവ് മുല്ലപ്പള്ളി രാമചന്ദ്രന്റെ ആവശ്യം മറ്റ് നേതാക്കളും പിന്തുണച്ചു. പാര്‍ട്ടി കാര്യക്ഷമമായി പ്രവര്‍ത്തിക്കണമെങ്കില്‍ പുതിയ കെപിസിസി പ്രസിഡന്റ് ചുമതലയേല്‍ക്കേണ്ടതുണ്ടെന്ന് മന്ത്രി കെ. മുരളീധരന്‍ പറഞ്ഞു. സര്‍ക്കാരിനെതിരായ രാഷ്ട്രീയ നീക്കങ്ങളെ ഫലപ്രദമായി നേരിടാന്‍ ശക്തമായ പാര്‍ട്ടി നേതൃത്വം അനിവാര്യമാണെന്നും അദ്ദേഹം അഭിപ്രായപ്പെട്ടു.

മുഴുവന്‍സമയ കെപിസിസി പ്രസിഡന്റ് ഉടന്‍ തന്നെ ഉണ്ടാകുമെന്നാണ് പ്രതീക്ഷയെന്ന് വി.എസ്. ശിവകുമാര്‍ പറഞ്ഞു. പാര്‍ട്ടിയും സര്‍ക്കാരും തമ്മിലുള്ള ആശയവിനിമയം കൂടുതല്‍ കാര്യക്ഷമമാക്കാന്‍ പുതിയ കെപിസിസി കമ്മിറ്റി നിലവില്‍ വരേണ്ടത് അനിവാര്യമാണെന്നും അദ്ദേഹം വ്യക്തമാക്കി.