ആയുഷ് മിഷന്‍ നിയമനത്തില്‍ വിവാദം; ഉത്തരവ് റദ്ദാക്കിയതില്‍ ദുരൂഹതയെന്ന് വിമര്‍ശനം

തിരുവനന്തപുരം: ആരോഗ്യവകുപ്പിന് കീഴിലുള്ള ആയുഷ് ഹോമിയോപ്പതി സ്റ്റേറ്റ് പ്രോഗ്രാം മാനേജര്‍ നിയമനം റദ്ദാക്കിയ സംഭവത്തില്‍ വിവാദം ശക്തമാകുന്നു. ജൂണ്‍ 26-ന് ഡോ. ആര്‍. രജികുമാറിനെ സ്റ്റേറ്റ് പ്രോഗ്രാം മാനേജറായി നിയമിച്ച സര്‍ക്കാര്‍, നാല് ദിവസത്തിനകം ഉത്തരവ് റദ്ദാക്കി ഡോ. അനില്‍ എസ്.കെയെ അതേ തസ്തികയില്‍ നിയമിച്ചു.

നിയമനം റദ്ദാക്കിയതിന്റെ കാരണം സര്‍ക്കാര്‍ ഉത്തരവില്‍ വ്യക്തമാക്കിയിട്ടില്ല. ഡോ. രജികുമാറിന്റെ നിയമന ഉത്തരവില്‍ മുന്‍ ഉദ്യോഗസ്ഥന്റെ കാലാവധി അവസാനിച്ചതിനെ തുടര്‍ന്നുള്ള നിയമനമാണെന്ന് രേഖപ്പെടുത്തിയിരുന്നപ്പോള്‍, ഉത്തരവ് റദ്ദാക്കിക്കൊണ്ടുള്ള രേഖയില്‍ ആരോഗ്യമന്ത്രിയുടെ കുറിപ്പിന്റെ അടിസ്ഥാനത്തിലാണ് നടപടി സ്വീകരിച്ചതെന്ന് മാത്രമാണ് പറയുന്നത്.

സംഭവത്തില്‍ ഡോക്ടര്‍മാര്‍ക്കിടയില്‍ കടുത്ത അതൃപ്തി ഉയര്‍ന്നിട്ടുണ്ട്. ആയുഷ് വകുപ്പിലെ നിയമനങ്ങളില്‍ നേരത്തെയും ക്രമക്കേടും മാനദണ്ഡങ്ങള്‍ പാലിക്കാത്തതുമെന്ന വിമര്‍ശനങ്ങള്‍ ഉയര്‍ന്നിരുന്നു. ഈ പശ്ചാത്തലത്തില്‍ പുതിയ നടപടി കൂടുതല്‍ ചോദ്യങ്ങള്‍ ഉയര്‍ത്തുന്നതായാണ് ആക്ഷേപം.

അതേസമയം, വിവാദത്തില്‍ പ്രതികരിച്ച ആരോഗ്യമന്ത്രി കെ. മുരളീധരന്‍ നിയമനം റദ്ദാക്കിയതിന് പ്രത്യേക കാരണമൊന്നുമില്ലെന്ന് പറഞ്ഞു. ഇത്തരം നടപടികള്‍ സാധാരണ സംഭവിക്കുന്നതാണെന്നും, ഒരാളെ നിയമിക്കുമ്പോള്‍ മറ്റൊരാള്‍ക്ക് അസൗകര്യം ഉണ്ടാകുന്നത് സ്വാഭാവികമാണെന്നും അദ്ദേഹം പ്രതികരിച്ചു. ഭൂതക്കണ്ണാടി വെച്ച് നോക്കുമ്പോഴാണ് പ്രശ്‌നങ്ങള്‍ ഉണ്ടെന്ന് തോന്നുക എന്നും മന്ത്രി വ്യക്തമാക്കി.