സിനിമാ മേഖലയിലേക്ക് ബിജെപിയെ വലിച്ചിഴക്കരുത്; ആരോപണങ്ങള്‍ക്ക് മറുപടിയുമായി എസ്. സുരേഷ്

തിരുവനന്തപുരം: സിനിമാ മേഖലയുമായി ബന്ധപ്പെട്ട വിഷയങ്ങളില്‍ അനാവശ്യമായി ബിജെപിയെ വലിച്ചിഴക്കാനുള്ള ശ്രമങ്ങള്‍ അംഗീകരിക്കാനാകില്ലെന്ന് ബിജെപി സംസ്ഥാന ജനറല്‍ സെക്രട്ടറി എസ്. സുരേഷ്. ഇത്തരത്തിലുള്ള ശ്രമങ്ങള്‍ക്കെതിരെ ശക്തമായ പ്രതിഷേധം രേഖപ്പെടുത്തുന്നതായും അദ്ദേഹം പറഞ്ഞു.

സിനിമാ മേഖലയില്‍ പ്രവര്‍ത്തിക്കുന്ന, രാഷ്ട്രീയ നിലപാടുകള്‍ മറച്ചുവയ്ക്കുന്നവര്‍ പൊതുരംഗത്ത് മാന്യത പാലിക്കണമെന്നും എസ്. സുരേഷ് ആവശ്യപ്പെട്ടു. പ്രതികരിക്കാന്‍ തുടങ്ങിയാല്‍ പലരുടെയും മുഖംമൂടി അഴിഞ്ഞുവീഴും എന്നും അദ്ദേഹം വിമര്‍ശിച്ചു.

ഇടനിലക്കാരെ ഉപയോഗിച്ച് കോടികള്‍ ചെലവഴിച്ച് ആളുകളെ സ്വാധീനിക്കേണ്ട സാഹചര്യം ബിജെപിക്കില്ലെന്നും എസ്. സുരേഷ് പറഞ്ഞു. സിനിമ, സാഹിത്യം, സാംസ്‌കാരിക മേഖലകളില്‍ ബിജെപിക്കൊപ്പം നില്‍ക്കുന്നവര്‍ ദേശീയതയെയും പ്രധാനമന്ത്രി നരേന്ദ്ര മോദിയുടെ നേതൃത്വത്തെയും പിന്തുണയ്ക്കുന്നവരാണെന്നും അദ്ദേഹം അഭിപ്രായപ്പെട്ടു.

നടി ശ്വേതാ മേനോനെതിരായ വിമര്‍ശനങ്ങളെയും എസ്. സുരേഷ് തള്ളി. ശ്വേതാ മേനോന്‍ ബിജെപി പ്രതിനിധിയായല്ല, അമ്മ സംഘടനയുടെ പ്രസിഡന്റെന്ന നിലയിലാണ് പ്രവര്‍ത്തിക്കുന്നതെന്നും, അടിസ്ഥാനരഹിതമായ ആരോപണങ്ങള്‍ ഉന്നയിച്ച് അവരെ അവഹേളിക്കാന്‍ ശ്രമിക്കരുതെന്നും അദ്ദേഹം കൂട്ടിച്ചേര്‍ത്തു.