നീറ്റ് പുനഃപരീക്ഷ: നിയന്ത്രണത്തിനെതിരെ ഡല്‍ഹി ഹൈക്കോടതിയെ സമീപിച്ച് ടെലിഗ്രാം

ന്യൂഡല്‍ഹി: നീറ്റ് പുനഃപരീക്ഷയുമായി ബന്ധപ്പെട്ട് ടെലിഗ്രാമിന് മേല്‍ കേന്ദ്ര സര്‍ക്കാര്‍ ഏര്‍പ്പെടുത്തിയ നിയന്ത്രണത്തിനെതിരെ ഡല്‍ഹി ഹൈക്കോടതിയെ സമീപിച്ച് ടെലിഗ്രാം. സര്‍ക്കാരിന്റെ നടപടിയില്‍ പ്രതിഷേധം രേഖപ്പെടുത്തി ടെലിഗ്രാമിന്റെ സി.ഇ.ഒയാണ് ഹര്‍ജി നല്‍കിയത്.

നീറ്റ് പരീക്ഷയുമായി ബന്ധപ്പെട്ട തട്ടിപ്പുകളും വ്യാജ സന്ദേശങ്ങളും പ്രചരിക്കുന്നത് തടയുന്നതിന്റെ ഭാഗമായാണ് ടെലിഗ്രാം ആപ്പിന് നിയന്ത്രണം ഏര്‍പ്പെടുത്തിയതെന്നും, ഗൂഗിള്‍ പ്ലേ സ്റ്റോറില്‍ നിന്ന് ആപ്പ് നീക്കാന്‍ നടപടി സ്വീകരിച്ചതെന്നും കേന്ദ്ര സര്‍ക്കാര്‍ വ്യക്തമാക്കിയിരുന്നു. എന്നാല്‍ ഈ നടപടി നിയമവിരുദ്ധവും ഉപയോക്താക്കളുടെ അവകാശങ്ങളെ ബാധിക്കുന്നതുമാണെന്നാണ് ടെലിഗ്രാമിന്റെ വാദം.

സര്‍ക്കാരിന്റെ നടപടി അംഗീകരിക്കാനാവില്ലെന്നും, ലോകമെമ്പാടുമായി ഏകദേശം 150 ദശലക്ഷം ആളുകളാണ് ടെലിഗ്രാം സേവനം ഉപയോഗിക്കുന്നതെന്നും സി.ഇ.ഒ പറഞ്ഞു. ഇത്തരത്തിലുള്ള വ്യാപക നിയന്ത്രണങ്ങള്‍ നിയമലംഘനം നടത്തുന്നവരെക്കാള്‍ സാധാരണ ഉപയോക്താക്കളെയാണ് കൂടുതല്‍ ബാധിക്കുന്നതെന്നും അദ്ദേഹം ചൂണ്ടിക്കാട്ടി.