എ. പത്മകുമാറിനെതിരായ നടപടി: ജില്ലാ കമ്മിറ്റിയില്‍ ചോദ്യങ്ങളുമായി ഒരു വിഭാഗം പ്രവര്‍ത്തകര്‍

കണ്ണൂര്‍: ശബരിമല സ്വര്‍ണക്കൊള്ളക്കേസ് പ്രതി എ. പത്മകുമാറിനെതിരായ സിപിഐഎം നടപടിയെ ചൊല്ലി ജില്ലാ കമ്മിറ്റി യോഗത്തില്‍ ഒരു വിഭാഗം പ്രവര്‍ത്തകര്‍ ചോദ്യങ്ങളുമായി രംഗത്തെത്തി. ഇത്രയും വൈകി നടപടി സ്വീകരിച്ചതിന്റെ പ്രസക്തി എന്താണെന്നും, നിലവിലെ സാഹചര്യത്തില്‍ എന്താണ് മാറ്റമുണ്ടായതെന്നും പ്രവര്‍ത്തകര്‍ ചോദ്യം ഉയര്‍ത്തി.

സംസ്ഥാന നേതൃത്വത്തിന്റെ നിര്‍ദേശപ്രകാരം എ. പത്മകുമാറിനെതിരെ ജില്ലാ കമ്മിറ്റി നടപടി സ്വീകരിക്കുമെന്ന സൂചന പുറത്തുവന്നതോടെ പാര്‍ട്ടിയുടെ പ്രാഥമിക അംഗത്വത്തില്‍ നിന്ന് പുറത്താക്കല്‍ ഉള്‍പ്പെടെയുള്ള കടുത്ത നടപടികളാണ് പ്രതീക്ഷിക്കപ്പെട്ടിരുന്നത്. എന്നാല്‍ നടപടി സസ്‌പെന്‍ഷനില്‍ ഒതുങ്ങിയതോടെ പ്രവര്‍ത്തകര്‍ക്കിടയില്‍ ഭിന്നാഭിപ്രായം രൂപപ്പെട്ടു.

എസ്ഐടി കുറ്റപത്രം സമര്‍പ്പിച്ചതിന് ശേഷം നടപടി സ്വീകരിക്കാമെന്നായിരുന്നു മുന്‍ നിലപാടെന്നും, അത് ഇപ്പോള്‍ മാറ്റാന്‍ കാരണമെന്താണെന്നും യോഗത്തില്‍ ചില അംഗങ്ങള്‍ ചോദിച്ചു. മുമ്പുണ്ടായിരുന്ന സാഹചര്യത്തില്‍ കാര്യമായ മാറ്റമൊന്നും ഉണ്ടായിട്ടില്ലെന്നും അവര്‍ ചൂണ്ടിക്കാട്ടി.

ആറര മണിക്കൂര്‍ നീണ്ട ജില്ലാ കമ്മിറ്റി യോഗത്തില്‍ പത്മകുമാര്‍ വിഷയം ഏകദേശം അരമണിക്കൂര്‍ മാത്രമാണ് ചര്‍ച്ചയായത്. അംഗങ്ങള്‍ ഉന്നയിച്ച ചോദ്യങ്ങള്‍ക്ക് വ്യക്തമായ മറുപടി നല്‍കാന്‍ നേതൃത്വത്തിന് കഴിഞ്ഞില്ലെന്നാണ് വിവരം.

അതേസമയം, എസ്ഐടി കുറ്റപത്രം സമര്‍പ്പിച്ച ശേഷം എ. പത്മകുമാറില്‍ നിന്ന് വീണ്ടും വിശദീകരണം തേടുകയും, അതിന്റെ അടിസ്ഥാനത്തില്‍ തുടര്‍നടപടികള്‍ സ്വീകരിക്കുകയും ചെയ്യുമെന്ന നിലപാടിലാണ് ജില്ലാ നേതൃത്വം.