തിരുവനന്തപുരത്ത് ഇളകിവീണ പാറയ്ക്കടിയില്‍ കുടുങ്ങി വയോധിക; രക്ഷാപ്രവര്‍ത്തനം വിജയം

തിരുവനന്തപുരം:  പാറശ്ശാലയില്‍ കനത്ത മഴയ്ക്കിടെ വലിയ പാറക്കല്ല് ഇളകിവീണ് വയോധിക അതിനടിയില്‍ കുടുങ്ങി. പാറശ്ശാല സ്വദേശിനിയായ രാജകുമാരി (50) എന്ന വീട്ടമ്മയ്ക്കാണ് പുലര്‍ച്ചെയുണ്ടായ ഈ അപകടത്തില്‍ പരുക്കേറ്റത്. ഏറെ നേരം നീണ്ടുനിന്ന അതീവ ദുഷ്‌കരമായ രക്ഷാപ്രവര്‍ത്തനത്തിനൊടുവിലാണ് ഇവരെ പാറയ്ക്കടിയില്‍ നിന്നും പുറത്തെടുക്കാന്‍ സാധിച്ചത്.

ഇന്ന് പുലര്‍ച്ചെ അഞ്ചരമണിയോടെ വീടിന് സമീപത്തുള്ള ശുചിമുറിയിലേക്ക് പോകുന്നതിനിടയിലാണ് മുകളില്‍ നിന്നും വന്‍ പാറക്കല്ല് അടര്‍ന്നു വീണത്. അപകടം കണ്ട് ഇവര്‍ ഓടി രക്ഷപ്പെടാന്‍ ശ്രമിച്ചെങ്കിലും ഇളകി വന്ന പാറ ഇവരുടെ മേല്‍ പതിക്കുകയായിരുന്നു. രാജകുമാരിയുടെ അരയ്ക്ക് താഴോട്ടുള്ള ഭാഗം പൂര്‍ണ്ണമായും പാറയ്ക്കടിയില്‍ കുടുങ്ങിയ നിലയിലായിരുന്നു.

പ്രദേശത്ത് കനത്ത മഴ തുടരുന്നതിനിടയിലും ഫയര്‍ഫോഴ്‌സും പൊലീസും നാട്ടുകാരും സംയുക്തമായി ചേര്‍ന്നാണ് രക്ഷാപ്രവര്‍ത്തനം നടത്തിയത്. ഒടുവില്‍ ജെസിബി ഉപയോഗിച്ച് വന്‍ പാറയുടെ ഒരുവശം ഏറെ പ്രയത്‌നപ്പെട്ട് ഉയര്‍ത്തിയാണ് വയോധികയെ പുറത്തെടുത്തത്. അപകടത്തില്‍ കാലിന് ഗുരുതരമായി പൊട്ടലേറ്റ രാജകുമാരിയെ ഉടന്‍ തന്നെ കാരക്കോണം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.