വീണാ ജോര്‍ജിനെതിരായ കരിങ്കൊടി പ്രതിഷേധക്കേസ്: വധശ്രമ വകുപ്പ് ഒഴിവാക്കി അന്തിമ കുറ്റപത്രം

കണ്ണൂര്‍: മുന്‍ ആരോഗ്യമന്ത്രി വീണാ ജോര്‍ജിനെതിരായ കരിങ്കൊടി പ്രതിഷേധവുമായി ബന്ധപ്പെട്ട കേസില്‍ വധശ്രമം ഉള്‍പ്പെടെയുള്ള ഗുരുതര വകുപ്പുകള്‍ ഒഴിവാക്കി പൊലീസ് അന്തിമ കുറ്റപത്രം കോടതിയില്‍ സമര്‍പ്പിച്ചു. ഇന്നലെയാണ് അന്വേഷണ സംഘം കുറ്റപത്രം കോടതിയില്‍ നല്‍കിയത്.

 വധശ്രമം, മാരകായുധം ഉപയോഗിച്ചുള്ള ആക്രമണം തുടങ്ങിയ ഗുരുതര കുറ്റങ്ങള്‍ക്കുള്ള വകുപ്പുകളാണ് അന്തിമ റിപ്പോര്‍ട്ടില്‍ നിന്ന് ഒഴിവാക്കിയത്. കേസുമായി ബന്ധപ്പെട്ട് വിശദമായ റിപ്പോര്‍ട്ട് സമര്‍പ്പിക്കാന്‍ ഹൈക്കോടതി നേരത്തെ പൊലീസിനോട് നിര്‍ദേശിച്ചിരുന്നു.

പോലീസിന്റെ പുതിയ നിലപാടിനെ തുടര്‍ന്ന് കേസ് രാഷ്ട്രീയപ്രേരിതമായിരുന്നുവെന്ന ആരോപണം ശരിവെക്കപ്പെടുകയാണെന്ന് കെഎസ്യു പ്രതികരിച്ചു. കേസില്‍ പ്രതിയായി അറസ്റ്റിലായി ജയില്‍വാസം അനുഭവിച്ച കെഎസ്യു കണ്ണൂര്‍ ജില്ലാ പ്രസിഡന്റ് എം.സി. അതുല്‍, പൊതുസമൂഹത്തോട് വീണാ ജോര്‍ജ് മാപ്പ് പറയണമെന്ന് ആവശ്യപ്പെട്ടു.

കരിങ്കൊടി പ്രതിഷേധത്തിനിടെ വീണാ ജോര്‍ജിനെ വധിക്കാന്‍ ശ്രമിച്ചെന്ന കേസില്‍ പുനഃരന്വേഷണം വേണമെന്ന് കെഎസ്യു നേരത്തെ ആവശ്യപ്പെട്ടിരുന്നു. വ്യാജ പരാതി നല്‍കിയെന്നാരോപിച്ച് വീണാ ജോര്‍ജിന്റെ ഗണ്‍മാനെതിരെ നടപടി സ്വീകരിക്കണമെന്നും സംഘടന ആവശ്യപ്പെട്ടിരുന്നു.

ഫെബ്രുവരി 25-ന് കണ്ണൂര്‍ റെയില്‍വേ സ്റ്റേഷനില്‍ വെച്ചായിരുന്നു കെഎസ്യു പ്രവര്‍ത്തകര്‍ വീണാ ജോര്‍ജിനെതിരെ കരിങ്കൊടി പ്രതിഷേധം സംഘടിപ്പിച്ചത്. പ്രതിഷേധത്തിനിടെ മാരകായുധവുമായി ആക്രമിക്കാന്‍ ശ്രമിച്ചെന്നായിരുന്നു എഫ്ഐആറില്‍ രേഖപ്പെടുത്തിയിരുന്നത്.