മിൽമ പാലിന്റെ വില വർധനവ് നാളെ മുതൽ പ്രാബല്യത്തിൽ; ലിറ്ററിന് 4 രൂപയുടെ വർധന

തിരുവനന്തപുരം: സംസ്ഥാനത്ത് മിൽമ പാലിന്റെ വില വർധനവ് നാളെ മുതൽ പ്രാബല്യത്തിൽ വരും. ലിറ്ററിന് നാല് രൂപയാണ് വർധിപ്പിച്ചിരിക്കുന്നത്. തൈരിന് കിലോയ്ക്ക് 10 രൂപയുടെ വർധനയും പ്രഖ്യാപിച്ചിട്ടുണ്ട്. ക്ഷീരകർഷകരുടെ ഉൽപാദനച്ചെലവ് വർധിച്ചതിനെ തുടർന്നാണ് വില വർധനവെന്ന് മിൽമ അറിയിച്ചു.

മിൽമയുടെ വിശദീകരണമനുസരിച്ച്, പാലിന് ലിറ്ററിന് നാല് രൂപ വർധിപ്പിക്കുമ്പോൾ അതിൽ 3.35 രൂപ നേരിട്ട് ക്ഷീരകർഷകർക്ക് ലഭിക്കും. വർധനവിന്റെ 83.75 ശതമാനവും കർഷകർക്ക് ലഭിക്കുന്ന തരത്തിലാണ് പുതിയ വിലനിർണയം.

പുതിയ വിലകൾ അച്ചടിച്ച പാൽ കവറുകൾ വിപണിയിലെത്താൻ കുറച്ച് സമയം കൂടി വേണ്ടിവരുമെന്ന് മിൽമ അറിയിച്ചു. അതിനാൽ നിലവിൽ വിപണിയിലുള്ള കവറുകളിൽ പഴയ വില രേഖപ്പെടുത്തിയിട്ടുണ്ടെങ്കിലും പുതിയ നിരക്കായിരിക്കും ഈടാക്കുക. ഏകദേശം ഒരു മാസം വരെ പഴയ വിലയുള്ള കവറുകൾ വിതരണം തുടരാനാണ് സാധ്യത. മിൽമ അവസാനമായി പാലിന്റെ വില വർധിപ്പിച്ചത് 2022 ഡിസംബർ ഒന്നിനായിരുന്നു. അന്ന് ലിറ്ററിന് ആറു രൂപയുടെ വർധനവാണ് നടപ്പാക്കിയിരുന്നത്.