നീറ്റ് യുജി 2026 പരീക്ഷ റദ്ദാക്കി; വീണ്ടും പരീക്ഷ നടത്താന്‍ തീരുമാനം

മെയ് 3ന് നടന്ന നീറ്റ് യുജി 2026 പരീക്ഷ റദ്ദാക്കുകയും വീണ്ടും പരീക്ഷ നടത്താന്‍ തീരുമാനിക്കുകയും ചെയ്തതായി നാഷണല്‍ ടെസ്റ്റിംഗ് ഏജന്‍സി അറിയിച്ചു. പുതിയ തീയതി പിന്നീട് അറിയിക്കുമെന്നും, വിദ്യാര്‍ത്ഥികള്‍ ഔദ്യോഗിക വെബ്സൈറ്റുകള്‍ മാത്രം ആശ്രയിക്കണമെന്നും അധികൃതര്‍ നിര്‍ദേശിച്ചു. പുതുക്കിയ രജിസ്ട്രേഷന്‍ ആവശ്യമില്ലെന്നും അധിക ഫീസ് ഈടാക്കില്ലെന്നും എന്‍ടിഎ വ്യക്തമാക്കി.

പരീക്ഷയ്ക്ക് മുമ്പ് പ്രചരിച്ച ഗസ് പേപ്പറില്‍ നിന്നുള്ള ഏകദേശം 120 ചോദ്യങ്ങള്‍ യഥാര്‍ത്ഥ പരീക്ഷയില്‍ ഉള്‍പ്പെട്ടതായി കണ്ടെത്തിയതിനെത്തുടര്‍ന്നാണ് നടപടി. പരീക്ഷയുടെ വിശ്വാസ്യത സംരക്ഷിക്കുന്നതിനായി അന്വേഷണം ശക്തമാക്കുകയും, വിഷയത്തില്‍ സഹകരിക്കാന്‍ തയ്യാറാണെന്നും എന്‍ടിഎ അറിയിച്ചു. പരീക്ഷയുമായി ബന്ധപ്പെട്ട ക്രമക്കേട് കേസ് സെന്‍ട്രല്‍ ബ്യൂറോ ഓഫ് ഇന്‍വെസ്റ്റിഗേഷന്‍ (സിബിഐ)ക്ക് കൈമാറാന്‍ കേന്ദ്രസര്‍ക്കാര്‍ തീരുമാനിച്ചിട്ടുണ്ട്.

മെയ് 7-നാണ് പരീക്ഷാ ക്രമക്കേടിനെക്കുറിച്ചുള്ള വിവരങ്ങള്‍ എന്‍ടിഎയ്ക്ക് ലഭിച്ചത്. തുടര്‍ന്ന് മെയ് 8ന് കേന്ദ്ര ഏജന്‍സികള്‍ക്ക് വിവരം കൈമാറി. 

അതേസമയം, മെയ് 3ന് നടന്ന പരീക്ഷ എല്ലാ സുരക്ഷാ മാനദണ്ഡങ്ങളും പാലിച്ചാണ് നടത്തിയതെന്നും എന്‍ടിഎ വ്യക്തമാക്കി. ജിപിഎസ് സൗകര്യമുള്ള വാഹനങ്ങളിലൂടെയാണ് ചോദ്യപേപ്പര്‍ എത്തിച്ചതെന്നും, പരീക്ഷാ കേന്ദ്രങ്ങളില്‍ സിസിടിവി നിരീക്ഷണവും ബയോമെട്രിക് പരിശോധനയും ഉണ്ടായിരുന്നുവെന്നും അധികൃതര്‍ കൂട്ടിച്ചേര്‍ത്തു.

വിദ്യാര്‍ത്ഥികളിലും രക്ഷിതാക്കളിലും ആശങ്ക ഉയരുന്നതായി അംഗീകരിച്ച എന്‍ടിഎ, അന്വേഷണം പൂര്‍ത്തിയാക്കാന്‍ ബന്ധപ്പെട്ട ഏജന്‍സികള്‍ക്ക് സമയം അനുവദിക്കണമെന്നും അഭ്യര്‍ത്ഥിച്ചു.