ബംഗാളില്‍ ബിജെപിക്കെതിരെ വിശാല പ്രതിപക്ഷസഖ്യം രൂപീകരിക്കാന്‍ ശ്രമം തുടങ്ങി മമത

മമതാ ബാനര്‍ജി ബംഗാളില്‍ ഭാരതീയ ജനതാ പാര്‍ട്ടിക്കെതിരെ വിശാല പ്രതിപക്ഷ സഖ്യം രൂപീകരിക്കാനുള്ള നീക്കങ്ങള്‍ ആരംഭിച്ചു. ഇടതുപക്ഷ കക്ഷികളോടും വിദ്യാര്‍ത്ഥി സംഘടനകളോടും സന്നദ്ധ സംഘടനകളോടും പിന്തുണ തേടി മമത രംഗത്തെത്തി. എന്നാല്‍ മമതയുമായി തല്‍ക്കാലം സഖ്യം വേണ്ടെന്ന നിലപാടിലാണ് കമ്മ്യൂണിസ്റ്റ് പാര്‍ട്ടി ഓഫ് ഇന്ത്യ (മാര്‍ക്‌സിസ്റ്റ്).

നിലവിലെ രാഷ്ട്രീയ സാഹചര്യത്തില്‍ തൃണമൂല്‍ കോണ്‍ഗ്രസിന് അധികാരത്തില്‍ തിരിച്ചുവരവ് ഏറെ പ്രയാസകരമാണെന്നാണ് വിലയിരുത്തല്‍. ബിജെപി ശക്തമായി മുന്നേറുകയും വോട്ടര്‍ പട്ടികയിലെ മാറ്റങ്ങള്‍ പാര്‍ട്ടിയെ ബാധിക്കുകയും ചെയ്തിട്ടുണ്ട്. ഈ സാഹചര്യത്തില്‍ ബിജെപിക്കെതിരെ ഒറ്റയ്ക്ക് പോരാടുന്നത് പ്രായോഗികമല്ലെന്ന തിരിച്ചറിവിലാണ് മമത വിശാല സഖ്യത്തിനായി ശ്രമം ശക്തമാക്കുന്നത്.

കോണ്‍ഗ്രസിനെയും സിപിഐഎമ്മിനെയും ബംഗാളില്‍ രാഷ്ട്രീയമായി തളര്‍ത്തിയത് തൃണമൂല്‍ കോണ്‍ഗ്രസാണെന്നതാണ് പശ്ചാത്തലം. എന്നിരുന്നാലും ബിജെപിയെ പൊതുവൈരിയായി കണ്ട് പഴയ ഭിന്നതകള്‍ മറക്കണമെന്നാണ് മമതയുടെ അഭ്യര്‍ഥന. സഹകരിക്കാന്‍ താല്‍പര്യമുള്ള എല്ലാവര്‍ക്കും തന്റെ വാതില്‍ തുറന്നിട്ടുണ്ടെന്നും അവര്‍ വ്യക്തമാക്കി.

അതേസമയം, മമതയോടുള്ള സമീപനത്തില്‍ മാറ്റം വരുത്തേണ്ടതില്ലെന്ന നിലപാടിലാണ് സിപിഐഎം നേതൃത്വം. സംസ്ഥാന സെക്രട്ടറി മുഹമ്മദ് സലീം ഇത് വ്യക്തമാക്കി. ബിജെപിയെ സംസ്ഥാനത്ത് വളര്‍ത്തിയത് മമതയാണെന്ന വിമര്‍ശനത്തില്‍ ഇടതുപക്ഷം ഇപ്പോഴും ഉറച്ചുനില്‍ക്കുന്നു.

ദേശീയ തലത്തില്‍ ഇന്ത്യ സഖ്യം പുനരുജ്ജീവിപ്പിക്കാനുള്ള ശ്രമവും മമത ആരംഭിച്ചിട്ടുണ്ട്. സഖ്യ നേതാക്കളുമായി ഫോണ്‍ വഴി ആശയവിനിമയം നടത്തിയതോടൊപ്പം അഖിലേഷ് യാദവ് കൊല്‍ക്കത്തയില്‍ എത്തി പിന്തുണ പ്രഖ്യാപിക്കുകയും ചെയ്തു.