വനിതാ സംവരണ ബില്‍: ചരിത്രപരമായ തീരുമാനം - പ്രധാനമന്ത്രി നരേന്ദ്ര മോദി

വനിതാ സംവരണ ബില്‍ ഇരുപത്തിയൊന്നാം നൂറ്റാണ്ടിലെ സുപ്രധാന തീരുമാനങ്ങളില്‍ ഒന്നാണെന്ന് പ്രധാനമന്ത്രി നരേന്ദ്ര മോദി പറഞ്ഞു. വനിതാ സംവരണ വിഷയത്തില്‍ രാജ്യം ഒറ്റക്കെട്ടായിരിക്കുകയാണെന്നും, നാരി ശക്തിക്ക് സമര്‍പ്പിക്കുന്ന ഒരു നിര്‍ണായക നീക്കമാണിതെന്നും അദ്ദേഹം വ്യക്തമാക്കി.

വനിതാ കേന്ദ്രീകൃതമായ വികസനമാണ് രാജ്യത്തിന്റെ ലക്ഷ്യമെന്നും, 2023-ല്‍ പോലെ ഇത്തവണയും ബില്‍ ഏകകണ്ഠമായി പാസാക്കണമെന്ന് അദ്ദേഹം അഭ്യര്‍ത്ഥിച്ചു. വനിതകളുടെ പ്രതിനിധാനം വര്‍ധിക്കുന്നത് ജനാധിപത്യത്തെ കൂടുതല്‍ ശക്തമാക്കുമെന്ന് പ്രധാനമന്ത്രി കൂട്ടിച്ചേര്‍ത്തു.

ഏപ്രില്‍ 16-ന് ആരംഭിക്കുന്ന പാര്‍ലമെന്റ് സമ്മേളനത്തില്‍ വനിതാ സംവരണം യാഥാര്‍ഥ്യമാകുമെന്ന് അദ്ദേഹം ആത്മവിശ്വാസം പ്രകടിപ്പിച്ചു. രാജ്യം ചരിത്രമെഴുതാന്‍ ഒരുങ്ങുകയാണെന്നും, 2029 മുതല്‍ സംവരണം നടപ്പാക്കണമെന്ന ആവശ്യം വ്യാപകമാണെന്നും അദ്ദേഹം പറഞ്ഞു. വിഷയത്തില്‍ പാര്‍ലമെന്റില്‍ വിശദമായ ചര്‍ച്ച നടക്കുമെന്നും അദ്ദേഹം അറിയിച്ചു.

സ്ത്രീകള്‍ ജനാധിപത്യത്തിന്റെ ശക്തമായ തൂണുകളാണെന്നും, രാഷ്ട്രപതി മുതല്‍ ധനമന്ത്രി സ്ഥാനത്തോളം വനിതകളുടെ സാന്നിധ്യം ഇതിനകം ശക്തമാണെന്നും പ്രധാനമന്ത്രി പറഞ്ഞു. പഞ്ചായത്ത് രാജ് സംവിധാനത്തിലൂടെയും സ്ത്രീശാക്തീകരണം ശക്തിപ്പെട്ടതായും അദ്ദേഹം ചൂണ്ടിക്കാട്ടി.

എല്ലാ മേഖലകളിലും സ്ത്രീകള്‍ ശ്രദ്ധേയമായ മുന്നേറ്റം കൈവരിച്ചിട്ടുണ്ടെന്നും, ജല്‍ ജീവന്‍ മിഷന്‍ വിജയത്തില്‍ സ്ത്രീകളുടെ പങ്ക് നിര്‍ണായകമാണെന്നും അദ്ദേഹം പറഞ്ഞു. പ്രതിപക്ഷ പാര്‍ട്ടികളും വനിതാ ശാക്തീകരണത്തിനായി ശ്രമങ്ങള്‍ നടത്തിയിട്ടുണ്ടെന്നും, സ്വാതന്ത്ര്യാനന്തരം രാഷ്ട്രപതി, പ്രധാനമന്ത്രി സ്ഥാനങ്ങളില്‍ വനിതകള്‍ എത്തിയതും രാജ്യത്തിന്റെ മുന്നേറ്റത്തിന്റെ തെളിവാണെന്നും അദ്ദേഹം കൂട്ടിച്ചേര്‍ത്തു.