മലയാള നടിമാരുടെ വെളിപ്പെടുത്തലുകളെ പിന്തുണയ്ച്ച തമിഴ്‌നടന്‍ വിശാലിനും കിട്ടി എട്ടിന്റെ പണി; പരിഹാസവുമായി താരത്തിനെതിരെ മീടൂ ആരോപണം ഉന്നയിച്ച നടി വീണ്ടും രംഗത്ത്

കൊച്ചി: ഹേമ കമ്മിറ്റി റിപ്പോര്‍ട്ട് പുറത്ത് വന്നതിന് പിന്നാലെ മലയാള സിനിമയിലുണ്ടായ വെളിപ്പെടുത്തലുകളില്‍ ഏറ്റവും രൂക്ഷമായ പ്രതികരണം നടത്തിയ തെന്നിന്ത്യന്‍ താരമാണ് തമിഴ്‌നാട്ടിലെ താര സംഘടനയായ നടികര്‍ സംഘത്തിന്റെ ജനറല്‍ സെക്രട്ടറി വിശാല്‍. സിനിമാ മോഖലയില്‍ ആരെങ്കിലും മോശമായി പെരുമാറുകയാണെങ്കില്‍ ചെരുപ്പ് കൊണ്ട് അടിക്കണമെന്നുമായിരുന്നു വിശാലിന്റെ പ്രതികരണം. താരത്തിന്റെ ഈ അഭിപ്രായ പ്രകടനത്തിന് പിന്നാലെ മുന്‍പ് വിശാലിനെതിരെ മീ ടു ആരോപണം ഉന്നയിച്ച നടി ശ്രീ റെഡ്ഡി ഇപ്പോള്‍ പരിഹാസവുമായി രംഗത്തെത്തിയിരിക്കുകയാണ്.

സ്ത്രീലമ്പടനായ അങ്കിളേ മാധ്യമങ്ങള്‍ക്ക് മുന്നില്‍ സംസാരിക്കുമ്പോള്‍ നാക്ക് സൂക്ഷിക്കണമെന്നായിരുന്നു ശ്രീ റെഡ്ഡിയുടെ സമൂഹമാധ്യമങ്ങളിലെ പ്രതികരണം. എല്ലാ സ്ത്രീകളും നിങ്ങളെ ഉപേക്ഷിച്ചത് എന്തിനാണെന്നും നടി ചോദിക്കുന്നുണ്ട്. കുറച്ചെങ്കിലും മര്യാദകാണിക്കണമെന്നും എക്കാലത്തെയും വലിയ വഞ്ചകനാണ് വിശാല്‍ എന്നുമാണ് ശ്രീ റെഡ്ഡി എക്‌സിലൂടെ തുറന്നടിച്ചത്.

`സ്ത്രീലമ്പടനായ നരച്ച മുടിയുള്ള അങ്കിള്‍, നിങ്ങള്‍ എക്കാലത്തെയും വഞ്ചകനാണ്... ലോകത്തിലെ ഏറ്റവും വലിയ ഫ്രോഡ്. മാധ്യമങ്ങള്‍ക്ക് മുന്നില്‍ ഒരുപാട് ഉദാഹരണങ്ങളുണ്ട്. നിങ്ങള്‍ ബഹുമാന്യനായ വ്യക്തിയാണെന്ന് ഞാന്‍ ഒരിക്കലും കരുതുന്നില്ല. ജീവിതത്തില്‍ എല്ലാ സ്ത്രീകളും നിങ്ങളെ വിട്ടു പോയത് എന്തുകൊണ്ട്? നിങ്ങളുടെ വിവാഹ നിശ്ചയം മുടങ്ങിപ്പോയത് എന്തുകൊണ്ട്? അടുത്ത തവണ ഈ ചോദ്യത്തിന് ഉത്തരം പറയൂ.. ഒരു സംഘടനയില്‍ സ്ഥാനമുള്ളത് വലിയ കാര്യമല്ല, കുറച്ചെങ്കിലും മര്യാദയുണ്ടോ... കര്‍മ്മഫലം നിങ്ങള്‍ക്ക് കിട്ടും. എന്റെ കയ്യില്‍ ധാരാളം ചെരുപ്പുകള്‍ ഉണ്ട്. ആവശ്യമുണ്ടെങ്കില്‍ അറിയിക്കൂ...` എന്നായിരുന്നു ശ്രീ റെഡ്ഡിയുടെ പോസ്റ്റ്.