നല്ല ഉദ്ദേശം മാത്രമാണുളളത്, എന്റെ പ്രസ്താവന വളച്ചൊടിച്ചു : സുരേഷ് ഗോപി

കോഴിക്കോട്: പിന്നാക്ക വിഭാഗക്കാരുടെ കാര്യം നോക്കാന്‍ മുന്നോക്ക ജാതിക്കാരെ കൊണ്ടുവരണമെന്ന് പറഞ്ഞത് തെറ്റായ ഉദ്ദേശ്യത്തോടെയല്ലെന്ന് സുരേഷ് ഗോപി. എന്റെ പ്രസ്താവന വളച്ചൊടിച്ചു. ആരും താന്‍ പറഞ്ഞത് മുഴുവന്‍ കൊടുത്തിട്ടില്ല. അവരുടെ ഉദ്ദേശം ബജറ്റിന്റെ ശോഭ കെടുത്തുക മാത്രമാണ്. പറഞ്ഞതും വിശദീകരണവും ഇഷ്ടപ്പെട്ടില്ലെങ്കില്‍ പ്രസ്താവന പിന്‍വലിക്കുന്നുവെന്നും സുരേഷ് ഗോപി പറഞ്ഞു.

ഉന്നതകുലജാതര്‍ ആദിവാസി വകുപ്പ് കൈകാര്യം ചെയ്യട്ടെയെന്നാണ് സുരേഷ് ഗോപി പറഞ്ഞത്. എങ്കില്‍ അവരുടെ കാര്യത്തില്‍ ഉന്നമനം ഉണ്ടാകും. അത്തരം ജനാധിപത്യ മാറ്റങ്ങള്‍ ഉണ്ടാകണമെന്നും തിനക്ക് ആദിവാസി വകുപ്പ് വേണമെന്ന് ആഗ്രഹം ഉണ്ടായിരുന്നുവെന്നും അദ്ദേഹം പറഞ്ഞു.

കേരളത്തില്‍ ടൂറിസം വികസനത്തിന് ഈ വര്‍ഷവും പണവും വകയിരുത്തിയിട്ടുണ്ട്. തിരഞ്ഞെടുപ്പിനെ ലക്ഷ്യം വെച്ചുള്ള ബജറ്റ് എന്ന് പറയുന്നത് കുത്തിത്തിരിപ്പുകളാണ്. പാര്‍ലമെന്റില്‍ ആയാലും അസത്യ പ്രചാരണം എന്നത് വലിയ മുതല്‍ക്കൂട്ടായി മാറിയിരിക്കുകയാണ് ചിലര്‍ക്ക്. ആസ്പിറേഷണല്‍ ഡിസ്ട്രിക്ട് പ്രോഗ്രാംസില്‍ വയനാട് വന്നിട്ടുണ്ട്. അത് വഴി വയനാടിന് വലിയ ഉന്നമനം ഉണ്ടായിരിക്കുമെന്നും സുരേഷ് ഗോപി പറഞ്ഞു.