റെക്കോഡ് വില്‍പ്പന; ഇന്ത്യയില്‍ കൂടുതല്‍ ആപ്പിള്‍ സ്റ്റോര്‍ തുറക്കും

ഡല്‍ഹി: ഇന്ത്യന്‍ വിപണിയില്‍ ഐഫോണിന് റെക്കോഡ് വില്‍പ്പന രേഖപ്പെടുത്തിയതിന് പിന്നാലെ ഇന്ത്യയില്‍ കൂടുതല്‍ ആപ്പിള്‍ സ്റ്റോര്‍ തുറക്കുമെന്ന് ആപ്പിള്‍ കമ്പനി സിഇഒ ടിം കുക്ക്. ആപ്പിളിന് വലിയ രീതിയിലുള്ള വളര്‍ച്ചയാണ് ഇന്ത്യയില്‍ ഉള്ളത്. അതുകൊണ്ട് തന്നെ ആപ്പിള്‍ ഉത്പന്നങ്ങള്‍ക്ക് ഇന്ത്യന്‍ വിപണിയില്‍ കൂടുതല്‍ സ്വീകാര്യത ഉണ്ടെന്നും കൂക്ക് വ്യക്തമാക്കി.

ഇന്ത്യന്‍ വിപണിയില്‍ സ്മാര്‍ട്‌ഫോണ്‍ വില്പന രണ്ടാമതും, കംപ്യൂട്ടര്‍, ടാബ്ലറ്റ് ഉത്പന്നങ്ങളില്‍ മൂന്നാം സ്ഥാനത്തുമാണ് ആപ്പിള്‍. ഇന്ത്യയില്‍ ഏറ്റവുമധികം വിറ്റു പോകുന്ന മോഡലാണ് ഐഫോണ്‍ എന്നും കുക്ക് പറഞ്ഞു. ഡിസംബര്‍ പകുതിയോടെ റെക്കോര്‍ഡ് വില്‍പ്പനയാണ് നടന്നത്. രാജ്യത്ത് മൊത്തത്തില്‍ വിറ്റഴിഞ്ഞ ഐഫോണുകളുടെ 23 ശതമാനം ഓഹരിയോടെ 2024 ല്‍ ഇന്ത്യന്‍ വിപണിയെ നയിച്ചത് ആപ്പിള്‍ ആണെന്നാണ് വിപണി ഗവേഷണ സ്ഥാപനമായ കൗണ്ടര്‍പോയിന്റ് റിസര്‍ച്ചിന്റെ വിലയിരുത്തല്‍. 

ഡിസംബര്‍ പകുതിയോടെ ഇന്ത്യന്‍ സ്മാര്‍ട്‌ഫോണ്‍ വിപണിയില്‍ 11 ശതമാനം ഓഹരിയാണ് ആപ്പിളിനുണ്ടായത്. ഫീച്ചറുകള്‍ വിപുലപ്പെടുത്തി ഏപ്രിലോടെ ഇന്ത്യന്‍ വിപണിയില്‍ ആപ്പിളിന്റെ ഇംഗ്ലീഷ് വേര്‍ഷന്‍ ഇറക്കുന്നുണ്ടെന്നും ടിം കുക്ക് അറിയിച്ചു. ഡിസംബര്‍ പകുതിയോടെ എക്കാലത്തെയും റെക്കോര്‍ഡ് നേട്ടമായ 124. 3 ബില്യണ്‍ ആണ് ആപ്പിള്‍ നേടിയത്. ഒരു വര്‍ഷത്തിന് മുമ്പ് ഒക്ടോബര്‍ - ഡിസംബര്‍ മാസത്തില്‍ 7 ശതമാനം അതായത് 33.91 ബില്ല്യണായി കമ്പനിയുടെ വരുമാനം കുറഞ്ഞിരുന്നു.

ആപ്പിള്‍ ഉത്പന്നമായ മാക് പിസിയുടെ വില്പന 7.78 ബില്ല്യണില്‍ നിന്നും 8.98 ബില്ല്യണായി കൂടുകയും, ഐപാഡിന്റെ വില്‍പ്പന 15 ശതമാനായി കൂടുകയും ചെയ്തു. എന്നാല്‍ ആപ്പിള്‍ ഉത്പന്നങ്ങള്‍ അധികവും നിര്‍മിക്കുന്ന ചൈനയില്‍ മറ്റ് രാജ്യങ്ങളെ അപേക്ഷിച്ച് വളരെ കുറഞ്ഞ നേട്ടമാണ് ഉണ്ടായിവരുന്നത്. ആപ്പിള്‍ ഉത്പന്നങ്ങളുടെ വില്പനയില്‍ 11 ശതമാനം ഇടിവാണ് ചൈനയില്‍ രേഖപ്പെടുത്തിയത്.