മദ്യ കമ്പനികള്‍ക്ക് നികുതി ഇളവ് നല്‍കാന്‍ സര്‍ക്കാര്‍ നിയമസഭാ നടപടികള്‍ മാറ്റി; ധനബില്ലില്‍ അനാവശ്യ ധൃതിയെന്ന് പിണറായി വിജയന്‍

തിരുവനന്തപുരം: മദ്യ കമ്പനികള്‍ക്ക് നികുതി ഇളവ് നല്‍കുക എന്ന ലക്ഷ്യത്തോടെ സര്‍ക്കാര്‍ നിയമസഭാ നടപടികളില്‍ മാറ്റം വരുത്തി ധനബില്‍ തിടുക്കത്തില്‍ പാസാക്കിയെന്ന് പ്രതിപക്ഷനേതാവ് പിണറായി വിജയന്‍ ആരോപിച്ചു. നിക്ഷിപ്ത താല്‍പര്യങ്ങള്‍ സംരക്ഷിക്കുന്നതിനായാണ് സര്‍ക്കാര്‍ സഭാ നടപടിക്രമങ്ങളില്‍ മാറ്റം വരുത്തിയതെന്നും ധനബില്‍ പാസാക്കാന്‍ മുഖ്യമന്ത്രി അനാവശ്യ ധൃതിയും വാശിയും കാണിച്ചുവെന്നും അദ്ദേഹം വിമര്‍ശിച്ചു.

സംസ്ഥാന താല്‍പര്യങ്ങള്‍ക്ക് അനുകൂലമായ കാര്യങ്ങളെ പിന്തുണയ്ക്കുകയും വിരുദ്ധമായ നടപടികളെ എതിര്‍ക്കുകയും ചെയ്യുന്നതാണ് പ്രതിപക്ഷത്തിന്റെ നിലപാടെന്ന് പിണറായി വിജയന്‍ പറഞ്ഞു. എന്നാല്‍, ഈ സര്‍ക്കാരിന്റെ നടപടികളില്‍ കോര്‍പ്പറേറ്റ് മുതലാളിമാരുടെ ലാഭതാല്‍പര്യങ്ങള്‍ സംരക്ഷിക്കുന്ന സമീപനമാണ് പ്രകടമായതെന്നും അദ്ദേഹം കുറ്റപ്പെടുത്തി.

ഏത് മാര്‍ഗത്തിലൂടെയും മദ്യ കമ്പനികള്‍ക്ക് നികുതി ഇളവ് നല്‍കണമെന്ന തീരുമാനമാണ് സര്‍ക്കാര്‍ സ്വീകരിച്ചതെന്നും അതിന്റെ ഭാഗമായാണ് ധനബില്‍ അതിവേഗം പാസാക്കിയതെന്നും അദ്ദേഹം ആരോപിച്ചു. സര്‍ക്കാര്‍ തീരുമാനം സംസ്ഥാനത്ത് മദ്യവ്യാപനം വര്‍ധിപ്പിക്കുമെന്നും പിണറായി വിജയന്‍ പറഞ്ഞു.

ധനബില്‍ സംബന്ധിച്ച് ചര്‍ച്ച നടത്തുമെന്ന യുഡിഎഫിന്റെ പ്രഖ്യാപനം പിന്നീട് പ്രഹസനമായി മാറിയെന്നും സഭയില്‍ നല്‍കിയ ഉറപ്പ് പാലിക്കാന്‍ സര്‍ക്കാര്‍ തയ്യാറായില്ലെന്നും അദ്ദേഹം പറഞ്ഞു. ബില്‍ പാസാക്കിയ ശേഷം ചര്‍ച്ച നടത്തുന്നതിന് പ്രസക്തിയില്ലെന്നും അദ്ദേഹം വിമര്‍ശിച്ചു.

ധനബില്‍ സബ്ജക്ട് കമ്മിറ്റിക്ക് വിടാതിരുന്നതിനെ ന്യായീകരിക്കാന്‍ സര്‍ക്കാര്‍ ഉന്നയിച്ച വാദങ്ങളും അദ്ദേഹം തള്ളി. മുന്‍ സര്‍ക്കാരിന്റെ അവസാന ധനബില്‍ സബ്ജക്ട് കമ്മിറ്റിക്ക് വിടാതിരുന്നതാണ് സര്‍ക്കാര്‍ ചൂണ്ടിക്കാട്ടുന്നതെങ്കിലും, അന്നത്തെ ധനബില്ലില്‍ പുതിയ നികുതി നിര്‍ദേശങ്ങളൊന്നും ഉണ്ടായിരുന്നില്ലെന്ന് പിണറായി വിജയന്‍ വ്യക്തമാക്കി.