പനിയും ഛര്‍ദിയും വയറിളക്കവും; വയനാട്ടില്‍ 40 ഓളം വിദ്യാര്‍ഥികള്‍ ചികിത്സയില്‍

വയനാട് കോളിയാടിയില്‍ പനിയും ഛര്‍ദിയും വയറിളക്കവും ബാധിച്ച് നാല്‍പ്പതോളം സ്‌കൂള്‍ വിദ്യാര്‍ഥികളെ ആശുപത്രിയില്‍ പ്രവേശിപ്പിച്ചു. കോളിയാടി മാര്‍ ബസേലിയോസ് എയുപി സ്‌കൂളിലെ വിദ്യാര്‍ഥികള്‍ക്കാണ് കൂട്ടത്തോടെ ശാരീരിക അസ്വസ്ഥതകള്‍ അനുഭവപ്പെട്ടത്. ഇതില്‍ എട്ട് കുട്ടികളെ ഇന്ന് മാത്രമാണ് ആശുപത്രിയില്‍ പ്രവേശിപ്പിച്ചത്. രോഗബാധിതരായ കുട്ടികളെ ബത്തേരി താലൂക്ക് ആശുപത്രിയിലും സമീപത്തെ മറ്റ് സ്വകാര്യ ആശുപത്രികളിലുമായി പ്രവേശിപ്പിച്ചു തീവ്രപരിചരണവും ചികിത്സയും നല്‍കിവരികയാണ്.

കുട്ടികള്‍ക്ക് ബാധിച്ചത് ബാക്ടീരിയല്‍ ഇന്‍ഫെക്ഷന്‍ (Bacterial Infection) ആകാനാണ് സാധ്യതയെന്നാണ് ഡോക്ടര്‍മാരുടെ പ്രാഥമിക നിഗമനം. ഭക്ഷ്യവിഷബാധയാണോ അതോ പടര്‍ന്നുപിടിക്കുന്ന തരത്തിലുള്ള വൈറല്‍ പനിയാണോ എന്ന കാര്യത്തിലും നിലവില്‍ സംശയമുണ്ട്. രോഗത്തിന്റെ യഥാര്‍ത്ഥ കാരണം വ്യക്തമാകുന്നതിനായി കുട്ടികളുടെ ശരീരത്തില്‍ നിന്നുള്ള വിവിധ സാമ്പിളുകള്‍ ആരോഗ്യവകുപ്പ് അധികൃതര്‍ ശേഖരിച്ച് പരിശോധനയ്ക്ക് അയച്ചിട്ടുണ്ട്. ഇതിന്റെ ഫലം വന്നതിനു ശേഷമേ കൃത്യമായ നിഗമനത്തിലെത്താന്‍ സാധിക്കൂ.

പല കുട്ടികള്‍ക്കും കടുത്ത പനിയുണ്ടെങ്കിലും നിലവില്‍ ആരുടെയും ആരോഗ്യനില ഗുരുതരമല്ലെന്ന് അധികൃതര്‍ വ്യക്തമാക്കി. ആശങ്കപ്പെടേണ്ട യാതൊരു സാഹചര്യവുമില്ലെന്ന് ബത്തേരി താലൂക്ക് ആശുപത്രി സൂപ്രണ്ട് ഡോ. കെ.വി. സിന്ധു അറിയിച്ചു. സ്‌കൂളിലെ കുടിവെള്ള സ്രോതസ്സുകളും കുട്ടികള്‍ കഴിച്ച ഭക്ഷണപദാര്‍ത്ഥങ്ങളും കേന്ദ്രീകരിച്ച് ആരോഗ്യവകുപ്പും ഭക്ഷ്യസുരക്ഷാ വിഭാഗവും അന്വേഷണം ആരംഭിച്ചിട്ടുണ്ട്.