രാജ്യത്ത് ഇന്ധന വില വര്‍ധിപ്പിച്ചു: പെട്രോള്‍, ഡീസല്‍ വില മൂന്നു രൂപ കൂട്ടി

ന്യൂഡല്‍ഹി: രാജ്യത്ത് ഇന്ധനവിലയില്‍ വന്‍ വര്‍ധനവ് രേഖപ്പെടുത്തി. പെട്രോളിനും ഡീസലിനും ലിറ്ററിന് മൂന്ന് രൂപ വീതമാണ് വര്‍ധിപ്പിച്ചത്. നാല് വര്‍ഷത്തെ ഇടവേളയ്ക്ക് ശേഷമാണ് ഇത്തരമൊരു വിലവര്‍ധനവ് ഉണ്ടാകുന്നത്. അന്താരാഷ്ട്ര വിപണിയില്‍ പശ്ചിമേഷ്യന്‍ സംഘര്‍ഷം കടുക്കുന്ന പശ്ചാത്തലത്തിലാണ് രാജ്യത്തെ എണ്ണക്കമ്പനികള്‍ വില പുതുക്കി നിശ്ചയിച്ചത്. ഇതോടെ ഡല്‍ഹിയില്‍ പെട്രോള്‍ വില 100 രൂപയ്ക്ക് അടുത്തെത്തി.

കേരളത്തിലെ പ്രധാന നഗരങ്ങളിലും വിലയില്‍ വലിയ മാറ്റമാണുണ്ടായത്. തിരുവനന്തപുരത്ത് പെട്രോള്‍ വില ലിറ്ററിന് 110.76 രൂപയായും ഡീസല്‍ വില 99.64 രൂപയായും ഉയര്‍ന്നു. കൊച്ചിയില്‍ പെട്രോളിന് 105 രൂപയ്ക്കടുത്താണ് നിലവിലെ നിരക്ക്. കുറച്ചു ദിവസങ്ങളായി ഇന്ധനവില വര്‍ധിക്കുമെന്ന അഭ്യൂഹങ്ങള്‍ നിലനിന്നിരുന്നെങ്കിലും മൂന്ന് രൂപയുടെ വര്‍ധനവ് സാധാരണക്കാര്‍ക്ക് വലിയ തിരിച്ചടിയായിരിക്കുകയാണ്.

സാമ്പത്തിക പ്രതിസന്ധിയും പണപ്പെരുപ്പവും കണക്കിലെടുത്ത് ആര്‍ബിഐ ഗവര്‍ണര്‍ നേരത്തെ തന്നെ മുന്നറിയിപ്പ് നല്‍കിയിരുന്നു. ഇതിന് പിന്നാലെ, കോവിഡ് കാലത്തിന് സമാനമായ സ്വയം നിയന്ത്രണങ്ങള്‍ പാലിക്കണമെന്ന് പ്രധാനമന്ത്രിയും ജനങ്ങളോട് ആഹ്വാനം ചെയ്തു. മാതൃകയെന്നോണം പ്രധാനമന്ത്രിയുടെ ഉള്‍പ്പെടെയുള്ള അകമ്പടി വാഹനങ്ങളുടെ എണ്ണം വെട്ടിക്കുറച്ചിട്ടുണ്ട്. വരും ദിവസങ്ങളിലും ഇന്ധനവിലയില്‍ മാറ്റമുണ്ടാകുമോ എന്ന ആശങ്കയിലാണ് വിപണി.