മുഖ്യമന്ത്രി പ്രഖ്യാപനം: ചെന്നിത്തല കടുത്ത അതൃപ്തിയിലെന്ന് റിപ്പോര്‍ട്ട്

തിരുവനന്തപുരം: സംസ്ഥാനത്തിന്റെ പുതിയ മുഖ്യമന്ത്രിയായി വി ഡി സതീശനെ തിരഞ്ഞെടുത്തതിന് പിന്നാലെ കോണ്‍ഗ്രസ് മുതിര്‍ന്ന നേതാവ് രമേശ് ചെന്നിത്തല കടുത്ത അസംതൃപ്തിലെന്ന് റിപ്പോര്‍ട്ട്. ഹൈക്കമാന്‍ഡിനെ തന്റെ അതൃപ്തി അറിയിച്ചതായാണ് റിപ്പോര്‍ട്ട്. ഇന്ന് നടക്കുന്ന നിയമസഭാ കക്ഷി യോഗത്തില്‍ പങ്കെടുക്കില്ലെന്ന നിലപാടും അദ്ദേഹം സ്വീകരിച്ചതായി സൂചനകള്‍ വ്യക്തമാക്കുന്നു.

മുഖ്യമന്ത്രി തിരഞ്ഞെടുപ്പില്‍ സീനിയോറിറ്റി പരിഗണിക്കാത്തതാണ് പ്രധാനമായും ചെന്നിത്തലയുടെ വിമര്‍ശനം. അവഗണന നേരിട്ടുവെന്നാണ് അദ്ദേഹത്തിന്റെ വിലയിരുത്തല്‍. ഇതിനിടെ, വീട്ടിലെ മറ്റൊരു വാതിലിലൂടെ പുറത്തിറങ്ങി കാറില്‍ കയറി പോയതായും റിപ്പോര്‍ട്ടുകളുണ്ട്. നിയുക്ത എംഎല്‍എ ജ്യോതികുമാര്‍ ചാമക്കാല ഉള്‍പ്പെടെയുള്ളവര്‍ ചെന്നിത്തലയുടെ വസതിയിലെത്തി കൂടിക്കാഴ്ച നടത്തി.

മുഖ്യമന്ത്രി പ്രഖ്യാപനത്തിന് തൊട്ടുമുമ്പ് രാഹുല്‍ ഗാന്ധി ചെന്നിത്തലയുമായി ഫോണില്‍ സംസാരിച്ചിരുന്നു. അതേസമയം, തന്റെ അസന്തോഷം രാഹുല്‍ ഗാന്ധിയോടു പോലും മറച്ചുവച്ചില്ലെന്നാണ് അടുത്ത വൃത്തങ്ങള്‍ നല്‍കുന്ന സൂചന.

ഇതിനിടെ, കേരളത്തിന്റെ നിയുക്ത മുഖ്യമന്ത്രിയായ വി ഡി സതീശന് അഭിനന്ദനങ്ങളുമായി കെ സി വേണുഗോപാല്‍ രംഗത്തെത്തി. മുഖ്യമന്ത്രിക്ക് പൂര്‍ണ പിന്തുണ നല്‍കുമെന്നും തീരുമാനം പൂര്‍ണ സംതൃപ്തികരമാണെന്നും അദ്ദേഹം പ്രതികരിച്ചു.