വി ഡി സതീശനും രമേശ് ചെന്നിത്തലയും ഡല്‍ഹിയില്‍; നേതാക്കളുമായി ഹൈക്കമാന്‍ഡ് ഇന്ന് ചര്‍ച്ച നടത്തും

ന്യൂഡല്‍ഹി: കേരളത്തിന്റെ പുതിയ മുഖ്യമന്ത്രിയെ നിശ്ചയിക്കുന്നതിനുള്ള നിര്‍ണ്ണായക ചര്‍ച്ചകള്‍ ഡല്‍ഹിയില്‍ പുരോഗമിക്കുന്നു. ഹൈക്കമാന്‍ഡ് പ്രതിനിധികളായ നിരീക്ഷകര്‍ കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയ്ക്ക് റിപ്പോര്‍ട്ട് സമര്‍പ്പിച്ചതോടെയാണ് നടപടികള്‍ രണ്ടാം ഘട്ടത്തിലേക്ക് കടന്നത്. ഇതിന്റെ ഭാഗമായി പ്രതിപക്ഷ നേതാവ് വി.ഡി. സതീശന്‍, മുതിര്‍ന്ന നേതാവ് രമേശ് ചെന്നിത്തല എന്നിവര്‍ ഹൈക്കമാന്‍ഡുമായി ഇന്ന് കൂടിക്കാഴ്ച നടത്തും.

മുഖ്യമന്ത്രിയെ സംബന്ധിച്ച തീരുമാനം നീണ്ടുപോകുന്നത് രാഷ്ട്രീയ തിരിച്ചടിയുണ്ടാക്കുമെന്ന നിരീക്ഷകരുടെ മുന്നറിയിപ്പിനെത്തുടര്‍ന്നാണ് നേതാക്കളെ അടിയന്തരമായി ഡല്‍ഹിയിലേക്ക് വിളിപ്പിച്ചത്. വി.ഡി. സതീശന് കേരള ഹൗസില്‍ വന്‍ സ്വീകരണമാണ് പ്രവര്‍ത്തകര്‍ ഒരുക്കിയത്. ജാമിയ മിലിയ, ഡല്‍ഹി സര്‍വകലാശാല എന്നിവിടങ്ങളില്‍ നിന്നുള്ള വിദ്യാര്‍ത്ഥികള്‍ ഉള്‍പ്പെടെയുള്ള വലിയൊരു വിഭാഗം പ്രവര്‍ത്തകര്‍ അദ്ദേഹത്തെ വരവേല്‍ക്കാന്‍ എത്തിയിരുന്നു.

അതേസമയം, മുഖ്യമന്ത്രി സ്ഥാനത്തിനായി വിവിധ നേതാക്കളുടെ അനുയായികള്‍ തെരുവിലിറങ്ങി പ്രതിഷേധിച്ചത് ഹൈക്കമാന്‍ഡിനെ പ്രതിരോധത്തിലാക്കിയിട്ടുണ്ട്. ഈ സാഹചര്യം കണക്കിലെടുത്ത് സമവായ ചര്‍ച്ചകള്‍ വേഗത്തില്‍ പൂര്‍ത്തിയാക്കാനാണ് നേതൃത്വത്തിന്റെ നീക്കം. എം.എല്‍.എമാരുടെ പിന്തുണയ്ക്ക് പുറമെ, സംസ്ഥാനത്തെ നിലവിലെ രാഷ്ട്രീയ-സാമൂഹിക സാഹചര്യങ്ങള്‍ കൂടി വിലയിരുത്തിയാകും അന്തിമ പ്രഖ്യാപനം ഉണ്ടാവുക.