മാസപ്പടി കേസില്‍ കൂടുതല്‍ വിവരങ്ങള്‍ പുറത്തുവരാനുണ്ടെന്ന് മാത്യു കുഴല്‍നാടന്‍

ഇടുക്കി: മാസപ്പടി കേസില്‍ ഇനിയും നിരവധി വിവരങ്ങള്‍ പുറത്തുവരാനുണ്ടെന്ന് മാത്യു കുഴല്‍നാടന്‍ എംഎല്‍എ. കേസില്‍ സിബിഐ അന്വേഷണം നടന്നാല്‍ മുന്‍ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയനും പ്രതിപ്പട്ടികയില്‍ ഉള്‍പ്പെടാന്‍ സാധ്യതയുണ്ടെന്ന ആരോപണവും അദ്ദേഹം ഉന്നയിച്ചു.

ടി. വീണ യാതൊരു സേവനവും നല്‍കാതെയാണ് പണം കൈപ്പറ്റിയതെന്നാണ് മാത്യു കുഴല്‍നാടന്റെ ആരോപണം. കള്ളപ്പണ വെളുപ്പിക്കല്‍ നിരോധന നിയമപ്രകാരമാണ് വീണയ്ക്കെതിരായ അന്വേഷണം നടക്കുന്നതെന്നും അദ്ദേഹം പറഞ്ഞു. സി.എം.ആര്‍.എല്ലിന് യഥാര്‍ത്ഥ സേവനം ലഭിച്ചത് പി.വിയില്‍ നിന്നാണെന്നും, കരിമണല്‍ ഖനനത്തിന് ആവശ്യമായ അവസരങ്ങളും അനുകൂല സാഹചര്യങ്ങളും മുന്‍ സര്‍ക്കാര്‍ ഒരുക്കിക്കൊടുത്തുവെന്നും അദ്ദേഹം ആരോപിച്ചു.

വീണ എന്തിനുവേണ്ടിയാണ് പണം സ്വീകരിച്ചതെന്ന ചോദ്യവും മാത്യു കുഴല്‍നാടന്‍ ഉയര്‍ത്തി. ബാങ്ക് വഴിയാണ് പണം കൈമാറിയതെങ്കിലും നിയമപരമായി ലഭിച്ച വരുമാനമെന്ന പേരില്‍ കള്ളപ്പണം വെളുപ്പിക്കാനുള്ള ശ്രമമാണ് നടന്നതെന്നാണ് അദ്ദേഹത്തിന്റെ ആരോപണം. യാതൊരു പ്രയോജനവുമില്ലാതെ ആരും കോടിക്കണക്കിന് രൂപ നല്‍കില്ലെന്നും അദ്ദേഹം പറഞ്ഞു.

സി.എം.ആര്‍.എല്‍ കമ്പനിക്ക് കരിമണല്‍ ഖനനത്തിന് അനുകൂലമായ നടപടികള്‍ സര്‍ക്കാര്‍ സ്വീകരിച്ചുവെന്നും, ഭൂപരിധി നിയമപ്രകാരം തിരിച്ചുപിടിക്കേണ്ട ഭൂമിക്ക് ഇളവുകള്‍ അനുവദിച്ചുവെന്നും മാത്യു കുഴല്‍നാടന്‍ ആരോപിച്ചു. 60 ഏക്കറിലധികം ഭൂമിക്ക് റവന്യൂ ഇളവ് നല്‍കിയതായും അദ്ദേഹം പറഞ്ഞു.