വയനാട്ടില്‍ വിദ്യാര്‍ഥികള്‍ക്ക് ഷിഗെല്ല: പ്രതിരോധം ഊര്‍ജിതമാക്കി ആരോഗ്യവകുപ്പ്

വയനാട്:  വയനാട് ജില്ലയിലെ വിദ്യാര്‍ഥികള്‍ക്കിടയില്‍ ഷിഗെല്ല രോഗം സ്ഥിരീകരിച്ച പശ്ചാത്തലത്തില്‍ പ്രതിരോധ പ്രവര്‍ത്തനങ്ങളും നിലവിലെ ആരോഗ്യസ്ഥിതിയും വിലയിരുത്താന്‍ ഇന്ന് ഉന്നതതല യോഗം ചേരും. സുല്‍ത്താന്‍ ബത്തേരി കോളിയാടി മാര്‍ ബസേലിയോസ് സ്‌കൂളിലെ രണ്ട് വിദ്യാര്‍ഥികള്‍ക്കാണ് നിലവില്‍ രോഗബാധ സ്ഥിരീകരിച്ചിട്ടുള്ളത്. രാവിലെ 9.30-ന് ബത്തേരി താലൂക്ക് ആശുപത്രിയിലാണ് യോഗം നിശ്ചയിച്ചിരിക്കുന്നത്. ആരോഗ്യ വകുപ്പ് മന്ത്രി കെ. മുരളീധരന്‍, കൃഷി വകുപ്പ് മന്ത്രി ടി. സിദ്ദീഖ് എന്നിവര്‍ ഉള്‍പ്പെടെയുള്ള ഉന്നതതല സംഘം യോഗത്തില്‍ പങ്കെടുത്ത് സ്ഥിതിഗതികള്‍ അവലോകനം ചെയ്യും.

രണ്ട് കുട്ടികള്‍ക്ക് ഷിഗെല്ല സ്ഥിരീകരിച്ചതിന് പുറമെ, രോഗലക്ഷണങ്ങള്‍ പ്രകടിപ്പിച്ച മറ്റ് 19 വിദ്യാര്‍ഥികളുടെ പരിശോധനാ ഫലം കൂടി ഇനി വരാനുണ്ട്. നിലവില്‍ മുന്നൂറിലധികം കുട്ടികള്‍ സമാനമായ ശാരീരിക ബുദ്ധിമുട്ടുകളോടെ വിവിധ ആശുപത്രികളില്‍ ചികിത്സ തേടിയിട്ടുണ്ട്. ഇതില്‍ 25 കുട്ടികളാണ് നിലവില്‍ ആശുപത്രികളില്‍ അഡ്മിറ്റായിട്ടുള്ളത്. എന്നാല്‍ ആരുടെയും ആരോഗ്യനില ഗുരുതരമല്ലെന്നും എല്ലാവരുടെയും സ്ഥിതി തൃപ്തികരമാണെന്നും ആരോഗ്യവകുപ്പ് അറിയിച്ചു. കാര്യങ്ങള്‍ പൂര്‍ണമായും നിയന്ത്രണവിധേയമായതിനാല്‍ പൊതുജനങ്ങള്‍ ആശങ്കപ്പെടേണ്ട സാഹചര്യമില്ലെന്നും അധികൃതര്‍ വ്യക്തമാക്കി.

കഴിഞ്ഞ വ്യാഴാഴ്ച വൈകുന്നേരത്തോടെയാണ് സ്‌കൂളിലെ കുട്ടികള്‍ക്ക് ആദ്യമായി രോഗലക്ഷണങ്ങള്‍ കണ്ടുതുടങ്ങിയത്. വെള്ളിയാഴ്ചയും ശനിയാഴ്ചയുമായി കൂടുതല്‍ കുട്ടികള്‍ ആശുപത്രികളില്‍ ചികിത്സ തേടുകയും, ഇന്നലെ ഔദ്യോഗികമായി രോഗം സ്ഥിരീകരിക്കുകയുമായിരുന്നു. എന്നാല്‍ രോഗബാധയുടെ യഥാര്‍ത്ഥ ഉറവിടം എവിടെ നിന്നാണെന്ന കാര്യത്തില്‍ ഇതുവരെ വ്യക്തത വന്നിട്ടില്ല. ഇതിന്റെ ഭാഗമായി സ്‌കൂളിലെ കുടിവെള്ളത്തിന്റെയും ഭക്ഷണത്തിന്റെയും സാമ്പിളുകള്‍ ശേഖരിച്ച് പരിശോധനയ്ക്ക് അയച്ചിട്ടുണ്ട്. മറ്റ് ബാഹ്യ ഉറവിടങ്ങളില്‍ നിന്നാണോ രോഗം പടര്‍ന്നത് എന്ന കാര്യവും ആരോഗ്യവകുപ്പ് വിശദമായി പരിശോധിച്ചു വരികയാണ്.

രോഗവ്യാപനം തടയുന്നതിനായി വിപുലമായ പ്രതിരോധ സംവിധാനങ്ങളാണ് ജില്ലയില്‍ ഉടനീളം ഒരുക്കിയിട്ടുള്ളത്. വിദഗ്ദ്ധ ഡോക്ടര്‍മാരുടെ സംഘം, ഡിഎംഒ, ആരോഗ്യ വകുപ്പിലെ മറ്റ് ഉന്നത ഉദ്യോഗസ്ഥര്‍ എന്നിവരടങ്ങുന്ന പ്രത്യേക സംഘം ബത്തേരിയിലും പരിസര പ്രദേശങ്ങളിലും പ്രതിരോധ പ്രവര്‍ത്തനങ്ങള്‍ക്കും പഠനങ്ങള്‍ക്കുമായി രംഗത്തുണ്ട്. കൃഷി വകുപ്പ് മന്ത്രി ടി. സിദ്ദീഖ് നിലവില്‍ ജില്ലയില്‍ ക്യാമ്പ് ചെയ്യുന്നുണ്ട്. ഉച്ചയോടെ ആരോഗ്യ മന്ത്രിയും വയനാട്ടിലെത്തും. ഇന്നത്തെ ഉന്നതതല യോഗത്തില്‍ കൂടുതല്‍ കുട്ടികളിലേക്ക് രോഗം പടര്‍ന്നിട്ടുണ്ടോ എന്ന് വിലയിരുത്തുകയും അടിയന്തര തുടര്‍നടപടികള്‍ സ്വീകരിക്കുകയും ചെയ്യും.