ബസ് സ്റ്റോപ്പില്‍ ഇറങ്ങാന്‍ വൈകിയ വയോധികനെ മര്‍ദിച്ചെന്ന് പരാതി; കെഎസ്ആര്‍ടിസി ഡ്രൈവര്‍ക്കെതിരെ കേസ്

തിരുവനന്തപുരം: ബസ് സ്റ്റോപ്പില്‍ ഇറങ്ങാന്‍ വൈകിയ വയോധികനെ കെഎസ്ആര്‍ടിസി ഡ്രൈവര്‍ കമ്പി കൊണ്ട് അടിച്ചും ബസില്‍ നിന്ന് ചവിട്ടിയിട്ടെന്നും പരാതി. തിരുവനന്തപുരം കിഴക്കേകോട്ടയില്‍ നിന്ന് കുറ്റിയാണിയിലേക്ക് പോയ ബസിലെ യാത്രക്കാരനായ വട്ടപ്പാറ സ്വദേശി ഭദ്രനാണ് ദുരനുഭവം നേരിട്ടത്. നിയമസഭാ തിരഞ്ഞെടുപ്പിന്റെ പോളിംഗ് ദിവസമാണ് സംഭവം ഉണ്ടായത്.

തിരുവനന്തപുരം ചാല മാര്‍ക്കറ്റില്‍ കച്ചവടം നടത്തുന്നയാളാണ് ഭദ്രന്‍. വൈകുന്നേരം വീട്ടിലേക്ക് മടങ്ങുന്നതിനായി ബസില്‍ കയറിയപ്പോഴാണ് സംഭവം. തനിക്ക് ഇറങ്ങേണ്ട സ്റ്റോപ്പില്‍ ബസ് നിര്‍ത്താതെ മറ്റൊരു സ്റ്റോപ്പില്‍ നിര്‍ത്തിയതോടെ പ്രശ്‌നം ആരംഭിച്ചു. ഈ സമയം വേഗത്തില്‍ ഇറങ്ങാന്‍ ഡ്രൈവര്‍ ആവശ്യപ്പെട്ടെങ്കിലും, കാലിന് അസ്വസ്ഥതയുള്ളതിനാല്‍ പതുക്കെ മാത്രമേ ഇറങ്ങാനാകൂവെന്ന് ഭദ്രന്‍ അറിയിച്ചതായി പറയുന്നു.

എന്നാല്‍ ഡ്രൈവര്‍ ഇത് അംഗീകരിക്കാതിരിക്കുകയും, പ്രകോപിതനായി വയോധികന്‍ ഇറങ്ങുന്നതിനിടെ കമ്പി കൊണ്ട് ആക്രമിക്കുകയും ദേഹത്ത് ചവിട്ടുകയും ചെയ്തുവെന്നാണ് പരാതി. പോളിംഗ് ദിവസം ആയതിനാല്‍ ബസില്‍ യാത്രക്കാര്‍ വളരെ കുറവായിരുന്നുവെന്നും പറയുന്നു.

മര്‍ദനത്തില്‍ ഭദ്രന്റെ തലയില്‍ അഞ്ചോളം തുന്നലുകള്‍ ഉണ്ട്. വാരിയെല്ലിനും പരുക്കേറ്റിട്ടുണ്ട്. ബന്ധുക്കളെത്തിയാണ് ഭദ്രനെ ആശുപത്രിയില്‍ പ്രവേശിപ്പിച്ചത്. സംഭവത്തില്‍ വട്ടപ്പാറ പോലീസില്‍ പരാതി നല്‍കിയതിനെ തുടര്‍ന്ന് ഡ്രൈവര്‍ക്കെതിരെ കേസ് രജിസ്റ്റര്‍ ചെയ്തിട്ടുണ്ട്.