വിവാഹ വാഗ്ദാനം നല്‍കി പീഡനം; സിപിഎം ഏരിയാ കമ്മിറ്റി അംഗത്തിനെതിരെ കേസ്

പത്തനംതിട്ട: വിവാഹ വാഗ്ദാനം നല്‍കി യുവതിയെ ലൈംഗികമായി പീഡിപ്പിച്ചെന്ന പരാതിയില്‍ സിപിഎം നേതാവിനെതിരെ പോലീസ് കേസെടുത്തു. റാന്നി ഏരിയാ കമ്മിറ്റി അംഗമായിരുന്ന അലന്‍ മാത്യുവിനെതിരെയാണ് പത്തനംതിട്ട പോലീസ് കേസെടുത്തത്. ഡിവൈഎഫ്‌ഐ ബ്ലോക്ക് പ്രസിഡന്റ് കൂടിയായിരുന്ന ഇയാള്‍ക്കെതിരെ ഗുരുതരമായ ആരോപണങ്ങളാണ് യുവതി ഉന്നയിച്ചിരിക്കുന്നത്.

വിവാഹം കഴിക്കാമെന്ന് വിശ്വസിപ്പിച്ച് അലന്‍ മാത്യു നിരന്തരം തന്നെ ദുരുപയോഗം ചെയ്തുവെന്ന് പരാതിക്കാരി ആരോപിക്കുന്നു. സംഭവത്തിന് പിന്നാലെ യുവതി ആത്മഹത്യയ്ക്ക് ശ്രമിച്ചിരുന്നു. നിലവില്‍ ഇവര്‍ ആശുപത്രിയില്‍ ചികിത്സയിലാണ്. യുവതിയുടെ മൊഴി രേഖപ്പെടുത്തിയ ശേഷമാണ് പോലീസ് എഫ്‌ഐആര്‍ രജിസ്റ്റര്‍ ചെയ്തത്.

പരാതി ഉയര്‍ന്നതിന് പിന്നാലെ സിപിഎം അടിയന്തര നടപടി സ്വീകരിച്ചു. അലന്‍ മാത്യുവിനെ തിരഞ്ഞെടുക്കപ്പെട്ട എല്ലാ സ്ഥാനങ്ങളില്‍ നിന്നും പാര്‍ട്ടി നീക്കം ചെയ്തു. പാര്‍ട്ടിയുടെ പ്രതിച്ഛായയ്ക്ക് മങ്ങലേല്‍പ്പിക്കുന്ന രീതിയിലുള്ള പ്രവര്‍ത്തനങ്ങള്‍ അനുവദിക്കില്ലെന്ന് നേതൃത്വം വ്യക്തമാക്കി. ഒളിവിലുള്ള പ്രതിക്കായി പോലീസ് അന്വേഷണം ഊര്‍ജ്ജിതമാക്കിയിട്ടുണ്ട്.