ഇസ്രയേലില്‍ മലയാളി മരിച്ചു

തിരുവനന്തപുരം:  ഇസ്രയേലില്‍ ജോലിക്ക് പോയ തിരുവനന്തപുരം കല്ലമ്പലം സ്വദേശി സുരേഷ് സുന്ദരേശന്‍ (42) മരണപ്പെട്ടതായി ബന്ധുക്കള്‍ക്ക് വിവരം ലഭിച്ചു. കല്ലമ്പലം മുത്താന ശിവശൈലത്തില്‍ താമസിക്കുന്ന സുരേഷിനെ കഴിഞ്ഞ കുറച്ചു ദിവസങ്ങളായി കാണാനില്ലെന്ന് ബന്ധുക്കള്‍ പരാതിപ്പെട്ടിരുന്നു. ഇസ്രയേലിലെ മലയാളി കൂട്ടായ്മയാണ് മരണവിവരം കുടുംബത്തെ അറിയിച്ചത്.

ഒരു വര്‍ഷം മുന്‍പ് ലേബര്‍ വിസയില്‍ ഇസ്രയേലിലേക്ക് പോയ സുരേഷ്, ആറുമാസം മുന്‍പ് മാതാവ് മരിച്ചപ്പോള്‍ നാട്ടിലെത്തി മടങ്ങിപ്പോയിരുന്നു. ഈ മാസം 17-നാണ് അദ്ദേഹം അവസാനമായി വീട്ടുകാരുമായി സംസാരിച്ചത്. അതിനുശേഷം ബന്ധപ്പെടാന്‍ സാധിക്കാത്തതിനെ തുടര്‍ന്ന് ബന്ധുക്കള്‍ നല്‍കിയ പരാതിയില്‍ ഇന്ത്യന്‍ എംബസിയും നോര്‍ക്കയും അന്വേഷണം നടത്തിവരികയായിരുന്നു. ഇയാളുടെ പാസ്പോര്‍ട്ട് വിവരങ്ങള്‍ ഇസ്രയേലിലെ മലയാളി സംഘടനകള്‍ക്ക് കൈമാറിയതിനെ തുടര്‍ന്ന് നടത്തിയ അന്വേഷണത്തിലാണ് സുരേഷ് കൊല്ലപ്പെട്ടതായി സൂചന ലഭിച്ചത്. എന്നാല്‍ ഇന്ത്യന്‍ എംബസി ഈ വാര്‍ത്ത ഔദ്യോഗികമായി സ്ഥിരീകരിച്ചിട്ടില്ല.