കോണ്‍ഗ്രസില്‍ സമവായ സൂചനകള്‍; കെ. സുധാകരനും അടൂര്‍ പ്രകാശിനും സീറ്റ് പരിഗണനയില്‍

കേരളത്തില്‍ കോണ്‍ഗ്രസിനുള്ളില്‍ സ്ഥാനാര്‍ത്ഥി നിര്‍ണയവുമായി ബന്ധപ്പെട്ടുണ്ടായിരുന്ന അനിശ്ചിതത്വങ്ങള്‍ക്കിടെ സമവായ സൂചനകള്‍ ശക്തമാകുന്നു. കെ. സുധാകരനും അടൂര്‍ പ്രകാശിനും സീറ്റ് നല്‍കുന്നത് ഹൈക്കമാന്‍ഡ് പരിഗണനയില്‍ എടുത്തതായി വിവരം. സുധാകരന്‍ കണ്ണൂരില്‍ മത്സരിക്കാനാണ് സാധ്യത.

 വാര്‍ത്താസമ്മേളനം നടത്തരുതെന്ന ഹൈക്കമാന്‍ഡിന്റെ അഭ്യര്‍ത്ഥന സുധാകരന്‍ അംഗീകരിച്ചു. സുധാകരനും അടൂര്‍ പ്രകാശും കേരള ഹൗസില്‍ നിന്ന് ബാധ്യതരഹിത സര്‍ട്ടിഫിക്കറ്റ് ആവശ്യപ്പെട്ടതായും അറിയുന്നു. സംസ്ഥാന പ്രോട്ടോക്കോള്‍ ഓഫീസര്‍ക്കാണ് ഇതിനായി അപേക്ഷ നല്‍കിയിരിക്കുന്നത്. ഇരുവരും നാമനിര്‍ദേശ പത്രിക സമര്‍പ്പിക്കാനുള്ള ഒരുക്കങ്ങള്‍ ആരംഭിച്ചിട്ടുണ്ട്.

ആദ്യഘട്ടത്തില്‍ എംപിമാര്‍ മത്സരിക്കേണ്ടെന്ന നിലപാടായിരുന്നു ഹൈക്കമാന്‍ഡിന് ഉണ്ടായിരുന്നത്. കോന്നിയും കണ്ണൂരും ഒഴിവാക്കി കൊണ്ടായിരുന്നു കോണ്‍ഗ്രസിന്റെ ആദ്യ സ്ഥാനാര്‍ത്ഥി പട്ടിക പുറത്തിറങ്ങിയത്. എന്നാല്‍, ഉള്‍കലഹം ശക്തമായതോടെ തിരഞ്ഞെടുപ്പ് സമിതി യോഗം വൈകുന്നേരത്തേക്ക് മാറ്റി.

കോന്നിയും കണ്ണൂരും ഒഴിവാക്കി രണ്ടാം സ്ഥാനാര്‍ത്ഥി പട്ടിക ഇന്ന് പുറത്തിറങ്ങാനിടയുണ്ട്. അതേസമയം, ശേഷിക്കുന്ന നാല്പത് സീറ്റുകളിലും സ്ഥാനാര്‍ത്ഥി പ്രഖ്യാപനം ഇന്ന് നടക്കുമെന്ന് പ്രതിപക്ഷ നേതാവ് വി.ഡി. സതീശന്‍ വ്യക്തമാക്കി. എംപിമാര്‍ മത്സരിക്കണമോയെന്ന കാര്യത്തില്‍ അന്തിമ തീരുമാനം ഹൈക്കമാന്‍ഡ് അറിയിക്കുമെന്നും, പ്രശ്‌നങ്ങളൊന്നുമില്ലാതെ സ്ഥാനാര്‍ത്ഥി പ്രഖ്യാപനം പൂര്‍ത്തിയാക്കാമെന്ന ആത്മവിശ്വാസവും അദ്ദേഹം പ്രകടിപ്പിച്ചു.