ശസ്ത്രക്രിയയ്ക്കിടെ വയറില്‍ തുണികഷണം തുന്നിക്കെട്ടിയ സംഭവം; സ്വകാര്യ ആശുപത്രിക്കെതിരെ പൊലീസ് കേസെടുത്തു

തിരുവനന്തപുരം: ശസ്ത്രക്രിയയ്ക്കിടെ രോഗിയുടെ വയറില്‍ തുണികഷണം വെച്ച് തുന്നിക്കെട്ടിയെന്ന പരാതിയില്‍ സ്വകാര്യ ആശുപത്രിക്കെതിരെ പൊലീസ് കേസ് രജിസ്റ്റര്‍ ചെയ്തു. കഴക്കൂട്ടത്തെ സി എസ് ഐ മിഷന്‍ ആശുപത്രിക്കെതിരെയാണ് നടപടി. മേനംകുളം സ്വദേശിയായ ഷീബ പ്രമോദ് നല്‍കിയ പരാതിയിലാണ് പൊലീസ് കേസെടുത്തത്.

2025 ഡിസംബര്‍ 3-ന് കഴക്കൂട്ടം സി എസ് ഐ ആശുപത്രിയില്‍ ഷീബയ്ക്ക് അപ്പന്‍ഡിക്സ് ശസ്ത്രക്രിയ നടത്തിയിരുന്നു. എന്നാല്‍ ശസ്ത്രക്രിയയ്ക്കിടെ വയറില്‍ തുണികഷണം വെച്ച് തുന്നിക്കെട്ടിയെന്ന ഗുരുതര ചികിത്സാ പിഴവാണ് സംഭവിച്ചതെന്നാണ് പരാതി. തുടര്‍ന്ന് ആരോഗ്യ പ്രശ്‌നങ്ങള്‍ ഗുരുതരമായതിനെ തുടര്‍ന്ന് നടത്തിയ പരിശോധനയിലാണ് മൂന്ന് മാസങ്ങള്‍ക്ക് ശേഷം വയറില്‍ തുണികഷണം ഉള്ളതായി കണ്ടെത്തിയത്.

ഇതോടെ പിന്നീട് അതേ ആശുപത്രിയില്‍ വീണ്ടും നടത്തിയ ശസ്ത്രക്രിയയിലൂടെ തുണികഷണം പുറത്തെടുത്തു. സംഭവത്തെ തുടര്‍ന്ന് ഷീബ പ്രമോദ് മുഖ്യമന്ത്രിക്കും കഴക്കൂട്ടം പോലീസിനും പരാതി നല്‍കി.

പരാതിയുടെ അടിസ്ഥാനത്തില്‍ സ്വകാര്യ ആശുപത്രിക്കെതിരെയാണ് പൊലീസ് കേസ് രജിസ്റ്റര്‍ ചെയ്തിരിക്കുന്നത്. ഷീബയുടെയും ഭര്‍ത്താവിന്റെയും മൊഴി പൊലീസ് ഇതിനകം രേഖപ്പെടുത്തി. ശസ്ത്രക്രിയ നടത്തിയ ഡോക്ടറെയും ഉടന്‍ ചോദ്യം ചെയ്യുമെന്ന് പൊലീസ് അറിയിച്ചു.