മുഖ്യമന്ത്രി ചര്‍ച്ച: എംഎല്‍എമാരുടെ പിന്തുണ നിര്‍ണായകം; പുറത്തുവന്ന ചിത്രങ്ങള്‍ തള്ളി സണ്ണി ജോസഫ്

തിരുവനന്തപുരം: കോണ്‍ഗ്രസിലെ മുഖ്യമന്ത്രി സ്ഥാനത്തെ ചര്‍ച്ചകള്‍ക്കിടെ എംഎല്‍എമാരുടെ പിന്തുണയാണ് ഏറ്റവും നിര്‍ണായക ഘടകമെന്ന് കെപിസിസി അധ്യക്ഷനും നിയുക്ത എംഎല്‍എയുമായ സണ്ണി ജോസഫ്.  താന്‍ യാതൊരു പക്ഷവും പിടിച്ചിട്ടില്ലെന്നും, പുറത്തുവന്ന എംഎല്‍എമാരുടെ പിന്തുണ രേഖപ്പെടുത്തിയ ചിത്രങ്ങള്‍ ശരിയല്ലെന്നും അദ്ദേഹം വ്യക്തമാക്കി.

എഐസിസി നിരീക്ഷകരുടെ കൈവശമുണ്ടായിരുന്ന രേഖകളുടെ ചിത്രങ്ങളാണ് പുറത്തുവന്നതെന്നും, അവയുടെ വിശ്വാസ്യത പരിശോധിക്കേണ്ടതുണ്ടെന്നും സണ്ണി ജോസഫ് പറഞ്ഞു. എംഎല്‍എമാരുടെ എണ്ണം മറ്റു ഘടകങ്ങളെക്കാള്‍ പ്രധാനമാണെന്നും, നേതാക്കള്‍ തമ്മില്‍ സമന്വയം അനിവാര്യമാണെന്നും അദ്ദേഹം കൂട്ടിച്ചേര്‍ത്തു.

പ്രവര്‍ത്തകരുടെ പ്രകടനങ്ങളും ഫ്‌ലെക്‌സുകളും നിയന്ത്രിക്കേണ്ടതുണ്ടെന്നും അദ്ദേഹം നിര്‍ദേശിച്ചു. നിരീക്ഷകര്‍ക്ക് മുന്നില്‍ നിഷ്പക്ഷത പാലിച്ചതായും, യാതൊരു പക്ഷവും പിന്തുണച്ചിട്ടില്ലെന്നും അദ്ദേഹം ആവര്‍ത്തിച്ചു. പുറത്തുവന്ന നമ്പറുകള്‍ വ്യത്യസ്തമാണെങ്കില്‍ അത് നേതൃത്വം പരിശോധിക്കണമെന്നും സണ്ണി ജോസഫ് പറഞ്ഞു.