ശബരിമല ആടിയ ശിഷ്ടം നെയ് കൊള്ളക്കേസ്: കീഴ് ശാന്തി അറസ്റ്റില്‍

ശബരിമലയിലെ ആടിയ ശിഷ്ടം നെയ്യ് വിൽപ്പനയിൽ ലക്ഷക്കണക്കിന് രൂപയുടെ ക്രമക്കേട് നടത്തിയ കേസിൽ ദേവസ്വം ബോർഡ് ജീവനക്കാരൻ അറസ്റ്റിൽ. ആലപ്പുഴ അരൂർ സ്വദേശിയായ സുനിൽ കുമാർ പോറ്റിയെയാണ് വിജിലൻസ് പത്തനംതിട്ട യൂണിറ്റ് പിടികൂടിയത്. മണ്ഡല മകരവിളക്ക് കാലത്ത് ശബരിമലയിലെ നെയ്യ് വിൽപ്പന കൗണ്ടറിന്റെ ചുമതലക്കാരനായിരുന്നു ഇയാൾ. ചാലിയേക്കര ഭദ്രകാളി ക്ഷേത്രത്തിലെ കീഴ്ശാന്തിയായി ജോലി ചെയ്തു വരികെയാണ് അറസ്റ്റ്. കോടതിയിൽ ഹാജരാക്കിയ പ്രതിയെ നിലവിൽ റിമാൻഡ് ചെയ്തിട്ടുണ്ട്.

അഭിഷേകത്തിന് ശേഷം ലഭിക്കുന്ന നെയ്യ് പാക്കറ്റുകളിലാക്കി വിൽക്കുന്നതിലൂടെ ദേവസ്വം ബോർഡിന് ലഭിക്കേണ്ട 36.24 ലക്ഷം രൂപയുടെ നഷ്ടം പ്രതികൾ വരുത്തിയെന്നാണ് കണക്കാക്കുന്നത്. വിൽപ്പനയിലൂടെ ലഭിച്ച തുക ബോർഡിൽ അടയ്ക്കാതെ സ്റ്റോക്കിൽ കൃത്രിമം കാണിച്ചാണ് തട്ടിപ്പ് നടത്തിയത്. ഹൈക്കോടതിയുടെ കർശന നിരീക്ഷണങ്ങളുടെയും നിർദ്ദേശങ്ങളുടെയും അടിസ്ഥാനത്തിൽ കഴിഞ്ഞ ജനുവരി മുതലാണ് വിജിലൻസ് ആൻഡ് ആന്റി കറപ്ഷൻ ബ്യൂറോ പ്രത്യേക അന്വേഷണ സംഘം രൂപീകരിച്ച് കേസ് അന്വേഷിക്കാൻ തുടങ്ങിയത്.

ദേവസ്വം ബോർഡിന് കീഴിലുള്ള കൂടുതൽ ജീവനക്കാർക്ക് ഈ സാമ്പത്തിക ക്രമക്കേടിൽ പങ്കുണ്ടോ എന്ന് വിജിലൻസ് പരിശോധിച്ചു വരികയാണ്. പ്രത്യേക അന്വേഷണ സംഘം നടത്തിയ വിശദമായ പരിശോധനയിലാണ് 36 ലക്ഷത്തിലധികം രൂപയുടെ കുറവ് ബോർഡിന്റെ കണക്കുകളിൽ കണ്ടെത്തിയത്. വരും ദിവസങ്ങളിൽ കൂടുതൽ അറസ്റ്റ് ഉണ്ടാകുമെന്നാണ് സൂചന. ശബരിമലയിലെ സാമ്പത്തിക ഇടപാടുകളിൽ സുതാര്യത ഉറപ്പാക്കണമെന്ന കോടതി ഉത്തരവ് നിലനിൽക്കെയാണ് അതീവ ഗൗരവകരമായ ഈ ക്രമക്കേട് പുറത്തുവരുന്നത്.