കൊച്ചി മേയര്‍ സ്ഥാനാര്‍ഥിത്വം: പാര്‍ട്ടി ചര്‍ച്ചകളിലൂടെയാണ് തീരുമാനം എടുത്തതെന്ന് സണ്ണി ജോസഫ്

കൊച്ചി മേയര്‍ സ്ഥാനാര്‍ഥിത്വവുമായി ബന്ധപ്പെട്ട വിഷയത്തില്‍ കെപിസിസി അധ്യക്ഷന്‍ സണ്ണി ജോസഫ് വിശദീകരണം നല്‍കി. കോണ്‍ഗ്രസിന് നിലവില്‍ നാല് സ്ഥലങ്ങളിലാണ് മേയര്‍ സ്ഥാനങ്ങള്‍ ഉള്ളതെന്നും, അതില്‍ കൊല്ലവും തിരുവനന്തപുരവും ഉള്‍പ്പെടെ രണ്ട് സ്ഥലങ്ങളില്‍ മേയര്‍ സ്ഥാനാര്‍ഥികളെ നേരത്തെ തന്നെ പ്രഖ്യാപിച്ചിരുന്നുവെന്നും അദ്ദേഹം പറഞ്ഞു. എന്നാല്‍ ശബരിനാഥന് ഭൂരിപക്ഷം ലഭിക്കാത്തതിനെ തുടര്‍ന്ന് ബാക്കി മൂന്ന് കോര്‍പറേഷനുകളിലെ മേയര്‍ സ്ഥാനാര്‍ഥികളെ കോണ്‍ഗ്രസ് പാര്‍ലമെന്ററി പാര്‍ട്ടി വിശദമായ ആലോചനകളിലൂടെ തീരുമാനിക്കുകയായിരുന്നു എന്നും സണ്ണി ജോസഫ് വ്യക്തമാക്കി.

ഈ മൂന്ന് സ്ഥലങ്ങളിലും ഒന്നിലധികം പേരുകള്‍ പരിഗണനയില്‍ ഉണ്ടായിരുന്നുവെന്നും, കൊച്ചിയിലും അതേ രീതിയിലായിരുന്നു ചര്‍ച്ചകള്‍ നടന്നതെന്നും അദ്ദേഹം പറഞ്ഞു. അവസാനം ഒരൊറ്റ പേരിലേക്കാണ് പാര്‍ട്ടി എത്തിയത്, അത് എല്ലാവരും ഒരുമിച്ച് അംഗീകരിച്ച തീരുമാനമാണെന്നും സണ്ണി ജോസഫ് കൂട്ടിച്ചേര്‍ത്തു.

ദീപ്തി മേരി വര്‍ഗീസിനെ കൊച്ചി മേയറായി തിരഞ്ഞെടുക്കുമെന്ന് പ്രതീക്ഷ അവര്‍ക്ക് ഉണ്ടായിരുന്നുവെന്നും, ഈ വിഷയത്തില്‍ ദീപ്തിക്ക് പരാതി ഉണ്ടെങ്കില്‍ അത് പരിശോധിക്കുമെന്നും കെപിസിസി അധ്യക്ഷന്‍ അറിയിച്ചു. ഈ വിഷയത്തില്‍ ദീപ്തി നേരത്തെ തന്നെ പ്രയാസം അറിയിച്ചിരുന്നുവെന്നും, ഭാരവാഹികള്‍ക്ക് പരിഗണന നല്‍കുക, അംഗങ്ങളുടെ അഭിപ്രായത്തിന് മുന്‍തൂക്കം നല്‍കുക തുടങ്ങിയ ചില മാനദണ്ഡങ്ങള്‍ മുന്നില്‍വച്ചാണ് കൊച്ചിയിലെ മേയര്‍ സ്ഥാനാര്‍ഥിയെ പ്രഖ്യാപിച്ചതെന്നും സണ്ണി ജോസഫ് വ്യക്തമാക്കി.