`തലതെറിച്ച പിള്ളേര്` അറിയാതെ `അമ്മവീട്` ഒ.എല്‍.എക്‌സില്‍ വില്‍പനയ്ക്ക്: മുട്ടലും തട്ടലും കാരണം വാതിലുകള്‍ക്ക് ബലക്ഷയം; 20,000 രൂപ ഓഫര്‍ പ്രൈസ്

കൊച്ചി: ഹേമ കമ്മിറ്റി റിപ്പോര്‍ട്ട് പുറത്തായതിനെ തുടര്‍ന്ന് സിനിമാ മേഖലയില്‍ വാര്‍ത്തകളോട് വാര്‍ത്തകളാണ്. പുതിയ പുതിയ ഞെട്ടിക്കുന്ന വെളിപ്പെടുത്തലുകളും ലൈംഗീക ആരോപണങ്ങളുമൊക്കെയായി ഒരാഴ്ച്ചയായി വാര്‍ത്താ മാധ്യമങ്ങള്‍ക്ക് താരങ്ങളുടെ `വിശേഷങ്ങള്‍` മാത്രമേ പറയാനുള്ളു. പരാതികളുടെയും കേസുകളുമൊക്കെ വന്നതോടെ രംഗം വിരസമായപ്പോള്‍ വെറൈറ്റി ട്രോളുകളുമായി ഇറങ്ങിയിരിക്കുകയാണ് ചില വിരുതന്മാര്‍.

താര സംഘടനയായ അമ്മയുടെ കൊച്ചിയിലെ ആസ്ഥാന മന്ദിരം ഓണ്‍ലൈന്‍ വില്‍പ്പന സൈറ്റായ ഒ.എല്‍.എക്‌സില്‍ വില്‍പ്പനയ്ക്ക് ഇട്ടിരിക്കുന്നതായ വാര്‍ത്തയാണ് ഇപ്പോള്‍ വൈറല്‍. മോഹന്‍ലാല്‍ ആന്റ് കോ എന്ന പേരിലുള്ള അക്കൗണ്ടിലാണ് അമ്മ ഓഫീസ് കെട്ടിടം വില്‍പ്പനയ്ക്ക് എന്ന നിലയില്‍ പോസ്റ്റ് ചെയ്തിരിക്കുന്നത്. മുട്ടലും തട്ടലും കാരണം വാതിലുകള്‍ക്ക് ബലക്ഷയമുണ്ടെന്നും അതിനാല്‍ ഓഫര്‍ പ്രൈസില്‍ വാങ്ങാന്‍ അവസരമുണ്ടെന്നുമാണ് പോസ്റ്റ്. കോടികള്‍ വിലമതിക്കുന്ന കെട്ടിടത്തിന് 20,000 രൂപയും ഓഫര്‍ പ്രൈസും നല്‍കിയിട്ടുണ്ട്.

ഹേമ കമ്മിറ്റി റിപ്പോര്‍ട്ട് വന്നതിനാല്‍ പെട്ടെന്ന് വില്‍പ്പന നടത്തുകയാണെന്ന് ഡിസ്‌ക്രിപ്ഷനില്‍ പറയുന്നു. വാതില്‍ മുട്ടിയോ, മെസഞ്ചറില്‍ സന്ദേശം അയച്ചോ വാങ്ങാന്‍ താല്‍പ്പര്യം അറിയിക്കാം. മുട്ടലുകള്‍ കാരണം കതകുകള്‍ക്ക് ബലക്കുറവുണ്ട്. കൂടെയുള്ളവരുടെ കൈയിലിരിപ്പുകാരണം വില്‍ക്കുന്നു എന്നും ഡിസ്‌ക്രിപ്ഷനിലുണ്ട്. 3,4 ദിവസത്തിനുള്ളില്‍ വില്‍പ്പന നടത്തണം എന്നും പറയുന്നു പരസ്യത്തില്‍.

നേരത്തെ അമ്മയുടെ ആസ്ഥാന മന്ദിരത്തില്‍ റീത്ത് വച്ചത് വലിയ വാര്‍ത്തയായിരുന്നു. ലോ കോളേജിലെ ഒരു കൂട്ടം വിദ്യാര്‍ഥികളാണ് റീത്ത് വച്ച് പ്രതിഷേധിച്ചത്. അച്ഛന്‍ ഇല്ലാത്ത അമ്മയ്ക്ക് എന്നതായിരുന്നു റീത്തിലെ വാചകം. ഒപ്പം താരങ്ങളെ അവഹേളിച്ചുള്ള കാര്‍ട്ടൂണും ഉണ്ടായിരുന്നു. ഈ രണ്ട് സംഭവത്തോടും അമ്മയുടെ ഭാരവാഹികളോ അംഗങ്ങളോ പ്രതികരിച്ചിട്ടില്ല.