സമ്പന്നരില്‍ ആദാനി ഒന്നാമത്; പിന്തള്ളിയത് മുകേഷ് അംബാനിയെ: ലോകത്തെ ഏറ്റവും സമ്പന്നനായ മലയാളിയായി എം.എ. യൂസഫലിയും

മുംബൈ: റിലയന്‍സ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനിയെ പിന്തള്ളി അദാനി ഗ്രൂപ്പ് ചെയര്‍മാന്‍ ഗൗതം അദാനി വീണ്ടും ഇന്ത്യയിലെ ഏറ്റവും സമ്പന്നന്‍ എന്ന നേട്ടം സ്വന്തമാക്കി. ഹുറൂണ്‍ ഇന്ത്യ സമ്പന്ന പട്ടികയിലാണ് 11.6 ലക്ഷം കോടി രൂപ ആസ്തിയുമായി ഗൗതം അദാനി ഒന്നാം സ്ഥാനത്തേക്ക് കയറിയത്. 2024 ജൂലൈ 31 വരെയുള്ള കണക്കുകള്‍ പ്രകാരമാണ് ഹുറൂണ്‍ പട്ടിക തയാറാക്കിയത്. 10.14 ലക്ഷം കോടി രൂപ ആസ്തിയുമായി മുകേഷ് അംബാനി രണ്ടാമതാണ്.

ഒരു വര്‍ഷത്തിനിടെ അദാനി കുടുംബത്തിന്റെ ആസ്തിയില്‍ 95 ശതമാനം വളര്‍ച്ചയുണ്ടായി. അംബാനി കുടുംബത്തിന്റെ ആസ്തി വളര്‍ച്ച 25 ശതമാനവും. എച്ച്‌സിഎല്‍ ഗ്രൂപ്പ് സാരഥി ശിവ് നാടാര്‍ 3.14 ലക്ഷം കോടി രൂപ ആസ്തിയുമായി മൂന്നാം സ്ഥാനത്ത്. സീറം ഇന്‍സ്റ്റിറ്റ്യൂട്ട് ഓഫ് ഇന്ത്യ മേധാവി സൈറസ് എസ്.പൂനാവാല 2.89 ലക്ഷം കോടിയുമായി നാലാംസ്ഥാനത്തുള്ളത്.

സണ്‍ ഫാര്‍മ മേധാവി ദിലീപ് സാങ്‌വി (2.49 ലക്ഷം കോടി രൂപ), ആദിത്യ ബിര്‍ല ഹ്രൂപ്പ് മേധാവി കുമാര്‍ മംഗളം ബിര്‍ല (2.35 ലക്ഷം കോടി രൂപ), ഹിന്ദുജ ഗ്രൂപ്പിലെ ഗോപിചന്ദ് ഹിന്ദുജ (1.92 ലക്ഷം കോടി രൂപ), അവന്യു സൂപ്പര്‍മാര്‍ട്ട് സാരഥി രാധാകിഷന്‍ ധമാനി (1.90 ലക്ഷം കോടി രൂപ), വിപ്രോ മേധാവി അസിം പ്രേംജി (1.90 ലക്ഷം കോടി രൂപ), ബജാജ് ഗ്രൂപ്പിലെ നിരജ് ബജാജ് (1.62 ലക്ഷം കോടി രൂപ) എന്നിവരാണ് ആദ്യ പത്തിലുള്ള മറ്റ് ശതകോടീശ്വരന്മാര്‍.

ബോളിവുഡ് സൂപ്പര്‍താരം ഷാറുഖ് ഖാന്‍ ആദ്യമായി ഹുറൂണ്‍ പട്ടികയില്‍ ഇടം നേടിയെന്ന പ്രത്യേകതയുണ്ട്. അന്‍പത്തിയെട്ടുകാരനായ ഷാറുഖാന്റെ ആസ്തി 7,300 കോടി രൂപയാണ്. ഐപിഎല്‍ ടീമായ കൊല്‍ക്കത്ത നൈറ്റ് റൈഡേഴ്‌സ്, റെഡ് ചില്ലീസ് എന്റര്‍ടെയ്ന്‍മെന്റ് എന്നിവയുടെ ഉടമസ്ഥനെന്ന നിലയില്‍ ആസ്തിയിലുണ്ടായ വര്‍ധന ഖാന് നേട്ടമായി.

പട്ടികയില്‍ ലുലു ഗ്രൂപ്പ് ചെയര്‍മാന്‍ എം.എ.യൂസഫലി ഇക്കുറിയും ഇടംപിടിച്ചു. ലോകത്തെ ഏറ്റവും സമ്പന്നനായ മലയാളിയായി തുടരുന്ന എം.എ. യൂസഫല, പട്ടികയിലെ പ്രവാസി ഇന്ത്യക്കാരില്‍ എട്ടാംസ്ഥാനത്ത്. 55,000 കോടി രൂപയാണ് അദ്ദേഹത്തിന്റെ ആസ്തി.