മുകേഷിന് ഇനി പിടിച്ച് നില്‍ക്കാനാകുമോ? കുരുക്ക് മുറുകി പോലീസ്; വെട്ടിലായി സി.പി.എമ്മും

കൊച്ചി: നടിയുടെ ലൈംഗിക പീഡന പരാതിയില്‍ പോലീസ് കേസെടുത്തതോടെ വെട്ടിലായിരിക്കുകയാണ് നടനും എംഎല്‍എയുമായ മുകേഷ്. ഒരു വശത്ത് മുകേഷിന്റെ രാജി ആവശ്യപ്പെട്ട് മുന്നണിയില്‍ നിന്നുള്ള സിപിഐയുടേത് അടക്കം ശക്തമായ പ്രക്ഷോപം മറുവശത്ത് കേസും പൊല്ലാപ്പും. മോഹന്‍ലാല്‍ ചെയ്തതുപോലെ തലയൂരാന്‍ രാജിയല്ലാതെ മുകേഷിന് മുന്നില്‍ മറ്റൊരു മാര്‍ഗവുമില്ലെന്ന സാഹചചര്യത്തിലേക്ക് കാര്യങ്ങള്‍ നീങ്ങുന്നത്.

ഇത്രയുമൊക്കെ ആയിട്ടും സി.പി.എം കൈവിടുന്നില്ല എന്നതാണ് മുകേഷിന്റെ കരുത്ത്. ബി.ജെ.പിയും കോണ്‍ഗ്രസും അടക്കമുള്ള പ്രതിപക്ഷ പാര്‍ട്ടികള്‍ മാത്രമല്ല ഭരണകക്ഷി മുന്നണിയില്‍ തന്നെയുള്ള പ്രധനപാര്‍ട്ടിയായ സി.പി.ഐയും രാജി ആവശ്യവുമായി തെരുവിലാണ്. പക്ഷെ മുകേഷിന് ഒരനക്കവും ഇല്ല. മുഖ്യമന്ത്രി പിണറായി വിജയനുമായുള്ള അടുപ്പമാണ് കരുത്ത്. എന്ത് വന്നാലും മുഖ്യമന്ത്രിയും പാര്‍ട്ടിയും സംരക്ഷിക്കുമെന്ന വിശ്വാസം മുകേഷിനുണ്ട്.

എന്നാല്‍ പാര്‍ട്ടിയില്‍ ഒരു വിഭാഗത്തിന് മുകേഷിനോട് കടുത്ത എതിര്‍പ്പുണ്ട്. പ്രത്യേകിച്ച് കൊല്ലം ജില്ലാ കമ്മിറ്റിയില്‍. അത് നിയമസഭാ തെരഞ്ഞെടുപ്പിലും ലോകസഭാ തെരഞ്ഞെടുപ്പിലും കണ്ടതാണ്. ലൈംഗീക പീഢന പരാതിയില്‍ ജാമ്യമില്ലാ വകുപ്പ് പ്രകാരം കേസ് കൂടി എടുത്തതോടെ മുകേഷിനെ സംരക്ഷിച്ചാല്‍ അത് പാര്‍ട്ടിക്ക് ദോഷം ചെയ്യുമെന്ന അഭിപ്രായമാണ് പ്രാദേശിക നേതൃത്വത്തിന്. ഇക്കാര്യം സംസ്ഥാന നേതൃത്വത്തെ അറിയിക്കും. എന്തു തന്നെയായാലും പിണറായി വിജയന്റെ തീരുമാനത്തിന്റെ അടിസ്ഥാനത്തിലായിരിക്കും മുകേഷിന്റെ ഭാവി.

ഏറണാകുളം സ്വദേശിയായ യുവതിയുടെ പരാതിയില്‍ മരട് പോലീസാണ് മുകേഷിനെതിരെ കേസെടുത്തിരിക്കുന്നത്. ജാമ്യമില്ലാ വകുപ്പ് ചുമത്തി ഐ.പി.സി. 354-ാം വകുപ്പ് ചുമത്തിയാണ് മുകേഷിനെതിരേ കേസെടുത്തിരിക്കുന്നത്. കഴിഞ്ഞ ദിവസം പ്രത്യേക അന്വേഷണ സംഘം പരാതിക്കാരിയുടെ മൊഴിയെടുത്തിരുന്നു. മുകേഷ് വഴങ്ങിത്തരണമെന്ന് ആവശ്യപ്പെട്ടുവെന്നും വൃത്തികെട്ട ഭാഷയില്‍ സംസാരിച്ചുവെന്നുമാണ് പരാതിക്കാരിയുടെ ആരോപണം.

അതേസമയം മുകേഷിന്റെ രാജി ആവശ്യപ്പെട്ടുള്ള പ്രക്ഷോപം ശക്തമാകുകയാണ്. ബുധനാഴ്ച മുകേഷിന്റെ ഓഫീസിലേക്ക് ആര്‍.വൈ.എഫ്., മഹിളാമോര്‍ച്ച, യു.ഡി.എഫ്. എന്നിവയുടെ നേതൃത്വത്തില്‍ പ്രതിഷേധപ്രകടനം നടന്നു. ആര്‍.വൈ.എഫ്. മാര്‍ച്ചില്‍ സംഘര്‍ഷമുണ്ടായി. സാംസ്‌കാരികകേരളത്തിലെ രാഷ്ട്രീയമാലിന്യമാണ് മുകേഷ് എന്നായിരുന്നു യു.ഡി.എഫ്. മാര്‍ച്ച് ഉദ്ഘാടനംചെയ്ത മുന്‍ എം.എല്‍.എ. ഷാനിമോള്‍ ഉസ്മാന്റെ വിമര്‍ശനം. ഇതിനുപുറമേ പാര്‍ട്ടിതലത്തിലും അദ്ദേഹത്തിനെതിരേ രൂക്ഷവിമര്‍ശനമുയരുന്നുണ്ട്.