160 കിലോമീറ്റര്‍ സെമി സ്പീഡിനെക്കുറിച്ച് കേരളം ആലോചിക്കുമ്പോള്‍ 450 കിലോമീറ്റര്‍ ഹൈസ്പീഡ് ട്രെയിന്‍ പുറത്തിറക്കി ചൈന: ഇത് ലോകത്തെ ഏറ്റവും വേഗമേറിയ ബുള്ളറ്റ് ട്രെയിന്‍

കൊച്ചി: കോടികള്‍ ചിലവഴിച്ചും ജനങ്ങളെ കുടിയിറക്കിയും 160 കിലോമീറ്റര്‍ സെമി സ്പീഡ് റെയില്‍ പാതയ്ക്കായി കേരളം ആവേശംകൊള്ളുമ്പോള്‍ മണിക്കൂറില്‍ 450 കിലോമീറ്റര്‍ വേഗതയില്‍ സഞ്ചരിക്കാനാകുന്ന ലോകത്തെ ഏറ്റവും വേഗമേറിയ ബുള്ളറ്റ് ട്രെയിന്‍ പുറത്തിറക്കിയിരിക്കുകയാണ് ചൈന. സിആര്‍ 450 എന്ന പ്രോട്ടോടൈപ്പ് മോഡലാണ് ചൈന പുറത്തിറക്കിയിരിക്കുന്ന പുതിയ ബുള്ളറ്റ് ട്രെയിന്‍.

യാത്രാസമയം കുറയ്ക്കാനും കൂടുതല്‍ സൗകര്യപ്രദവും കാര്യക്ഷമവുമായ യാത്രാനുഭവം നല്‍കാനും ഈ ട്രെയിനിന് സാധിക്കുമെന്നും ചൈന റെയില്‍വേ അറിയിച്ചു. ചൈനയുടെ തന്നെ സിആര്‍ 400 എന്ന മോഡലായിരുന്നു ലോകത്തെ ഇതുവരെയുള്ള ഏറ്റവും വേഗതയോറിയ ബുള്ളറ്റ് ട്രെയിന്‍. മണിക്കൂറില്‍ 350 കിലോമീറ്ററായിരുന്നു ഇതിന്റെ വേഗത. ഇതാണ് ഇപ്പോള്‍ വേഗത കൂട്ടി അപ്പ്‌ഗ്രേഡ് ചെയ്തിരിക്കുന്നത്.

ഹൈസ്പീഡ് ബുള്ളറ്റ് ട്രെയിനുകള്‍ ചൈനക്ക് ലാഭകരമല്ലെന്നാണ് കണക്കുകള്‍ വ്യക്തമാക്കുന്നതെങ്കിലും ജനങ്ങള്‍ക്ക് വേഗത്തിലുള്ള യാത്രാസൗകര്യം ഒരുക്കുന്നതിനാണ് നഷ്ടം സഹിച്ചും കൂടുതല്‍ വേഗമുള്ള ട്രെയ്‌നുകള്‍ ചൈന ഇറക്കുന്നത്. ഇതുവരെ ബെയ്ജിങ്-ഷാങ്ഹായ് ട്രെയിന്‍ സര്‍വീസ് മാത്രമാണ് ലാഭകരമായി ഓടുന്നത്. എന്നാല്‍ ലാഭത്തിനേക്കാള്‍ ഉപരി രാജ്യത്തിന്റെ സാമ്പത്തിക-സാമൂഹിക വികസനത്തില്‍ നിര്‍ണായകമായ പങ്ക് ബുള്ളറ്റ് ട്രെയിനുകള്‍ വഹിക്കുന്നുണ്ടെന്ന് ചൈന വ്യക്തമാക്കുന്നു.