മോദിക്ക് പിന്നാലെ കേരളത്തിലെ സഭാ ആസ്ഥാനങ്ങള്‍ സന്ദര്‍ശിച്ച് സുരേന്ദ്രന്‍: രാഷ്ട്രീയപരമല്ലെന്നും സൗഹൃദ സന്ദര്‍ശനമെന്നും വിശദീകരണം; തൃശൂര്‍ മേയറേയും കണ്ടു

തൃശൂര്‍: ബി.ജെ.പി ദേശീയ നേതാക്കള്‍ ഭാരതീയ കത്തോലിക്ക സഭയുടെ ആസ്ഥാനമായ ഡെല്‍ഹിയിലെ സി.ബി.സി.ഐ കാര്യാലയത്തിലെത്തി ബിഷപ്പുമാരുമായി കൂടിക്കാഴ്ച നടത്തിയതിന് പിന്നാലെ കേരളത്തിലെ ബി.ജെ.പി അധ്യക്ഷന്‍ കെ.സുരേന്ദ്രനും കത്തോലിക്ക സഭാ മേലധ്യക്ഷന്മാരുമായി കൂടിക്കാഴ്ച്ച നടത്തി. സീറോ മലബാര്‍ സഭയുടെ തൃശൂര്‍ അതിരൂപത ആര്‍ച്ച്ബിഷപ്പ് മാര്‍ ആന്‍ഡ്രൂസ് താഴത്തിനേയാണ് തൃശൂര്‍ അതിരൂപതാ ആസ്ഥാനത്തെത്തി കൂടിക്കാഴ്ച്ച നടത്തിയത്.

കൂടിക്കാഴ്ച്ച രാഷ്ട്രീയ പരമായിരുന്നില്ലെന്നും സാമുദായിക സൗഹാര്‍ദം വര്‍ധിപ്പിക്കുന്നതിന്റെ ഭാഗമായിട്ടാണ് സന്ദര്‍ശനമെന്നും സുരേന്ദ്രന്‍ പറഞ്ഞു. സി.ബി.സി.ഐ പ്രസിഡന്റുകൂടിയാണ് മാര്‍ ആന്‍ഡ്രൂസ് താഴത്ത്. കഴിഞ്ഞ ദിവസങ്ങളില്‍ പ്രധാനമന്ത്രി നരേന്ദ്ര മോദിയും കേന്ദ്രമന്ത്രിമാരും ബി.ജെ.പി നേതാക്കളുമൊക്കെ സി.ബി.സി.ഐ ആസ്ഥാനത്തെത്തി ബിഷപ്പുമാരുമായി കൂടിക്കാഴ്ച്ച നടത്തിയിരുന്നു.

തന്റെ സന്ദര്‍ശനം രാഷ്ട്രീയമായ കാര്യമേയല്ലെന്ന് കെ സുരേന്ദ്രന്‍ പറഞ്ഞു. പരസ്പരവിശ്വാസത്തിന്റേയും പരസ്പരം മനസിലാക്കലിന്റേയുമെല്ലാം ആഘോഷവും ഉത്സവമാണ് ക്രിസ്മസ്. മലയാളികളെല്ലാം ഒരുമിച്ച് ക്രിസ്മസ് ആഘോഷിക്കുന്നു. നാലുവര്‍ഷമായി ബി.ജെ.പി സ്നേഹസന്ദേശം കൈമാറുന്നതിനായി ഇത്തരം സന്ദര്‍ഷനങ്ങള്‍ ക്രിസ്മസിനും ന്യൂയറിനും നടത്തിവരുന്നു. പതിവുപോലെ ഇത്തവണയും നടത്തിയ സാധാരണ കൂടിക്കാഴ്ചയാണെന്നും രാഷ്ട്രീയമില്ലെന്നും അദ്ദേഹം വിശദീകരിച്ചു.

പാലക്കാട് സ്‌കൂളില്‍ കുട്ടികളുടെ ക്രിസ്മസ് ആഘോഷം വി.എച്ച്.പി തടഞ്ഞതിന്റേയും പുല്‍ക്കൂട് തകര്‍ത്തതിന്റേയും വിവാദങ്ങള്‍ക്കിടെയാണ് കെ.സുരേന്ദ്രന്റെ സന്ദര്‍ശനം. സി.പി.എം ഭരിക്കുന്ന തൃശൂര്‍ കോര്‍പറേഷന്‍ മേയര്‍ എം.കെ. വര്‍ഗീസുമായും സുരേന്ദ്രന്‍ കൂടിക്കാഴ്ച നടത്തി.
കൂടിക്കാഴ്ച രാഷ്ട്രീയപരമല്ലെന്നും സ്‌നേഹത്തിന്റെ സന്ദര്‍ശനം മാത്രമാണെന്നും ഇവിടേയും സുരേന്ദ്രന്‍ പറഞ്ഞു.  

ക്രിസ്മസ് ദിവസം തന്റെ വസതിയില്‍ ആരു വന്നാലും സ്വീകരിക്കുമെന്നും ക്രിസ്മസ് സ്‌നേഹത്തിന്റെ ദിവസമാണെന്നും മേയര്‍ എം.കെ. വര്‍ഗീസ് പറഞ്ഞു. ബിജെപി സംസ്ഥാന അധ്യക്ഷന്‍ തന്നെ വന്ന് കണ്ടതില്‍ സന്തോഷമുണ്ട്. മുന്‍പ് ബി.ജെ.പി എം.പിയും കേന്ദ്ര സഹമന്ത്രിയുമായ സുരേഷ് ഗോപിയെ പ്രശംസിച്ചതിനെ തുടര്‍ന്ന് വിവാദങ്ങളില്‍ ഏര്‍പ്പെട്ടയാളാണ് മേയര്‍. വാക്കുകളില്‍ രാഷ്ട്രീയം കലര്‍ത്തേണ്ട ആവശ്യമില്ല എന്നായിരുന്നു അന്ന് മേയര്‍ നല്‍കിയ മറുപടി.