മദ്യലഹരിയില്‍ വാക്ക് തര്‍ക്കം: തൃശൂരില്‍ യുവാവിനെ അടിച്ചുകൊന്ന് പുഴയില്‍ തള്ളി: ആറുപേര്‍ അറസ്റ്റില്‍

തൃശൂര്‍: ക്രിമനല്‍ സംഘാംഗങ്ങള്‍ ചേര്‍ന്ന് മദ്യപിക്കുന്നതിനിടെ വാക്ക് തര്‍ക്കത്തെ തുടര്‍ന്ന് യുവാവിനെ അടിച്ചുകൊന്ന ശേഷം മൃതദേഹം പുഴയില്‍ തള്ളി. തൃശൂര്‍ ചെറുതുരുത്തിയിലാണ് നാടിനെ നടുക്കി കൊലപാതകം നടന്നത്. നിലമ്പൂര്‍ വഴിക്കടവ് സ്വദേശി സൈനുല്‍ ആബിദ് (39) ആണ് കൊല്ലപ്പെട്ടതെന്ന് പോലീസ് അറിയിച്ചു. കൊലപാതകത്തില്‍ ആറുപേറെ പോലീസ് അറസ്റ്റ് ചെയ്തു.

മദ്യപാനത്തിനിടേയുണ്ടായ തര്‍ക്കം കൊലപാതകത്തിലേക്ക് നയിക്കുകയായിരുന്നു. പുഴയില്‍ മരിച്ച നിലയിലായിരുന്നു സൈനുല്‍ ആബിദിന്റെ മൃതദേഹം കണ്ടെത്തിയത്. വലിയ രീതിയില്‍ മര്‍ദ്ദനമേറ്റതാണ് മരണത്തിന് ഇടയാക്കിയതെന്ന് പോസ്റ്റ്‌മോര്‍ട്ടത്തില്‍ വ്യക്തമായതോടെ പോലീസ് ശക്തമായ അന്വേഷണം നടത്തുകയായിരുന്നു. അന്വേഷണത്തിനൊടുവില്‍ സൈനുല്‍ ആബിദിനൊപ്പം മദ്യപിച്ചവരെ കണ്ടെത്തി കസ്റ്റഡിയിലെടുത്തു.

വിശദമായ ചോദ്യം ചെയ്യലിന് ഒടുവില്‍ പ്രതികള്‍ കുറ്റം സമ്മതിച്ചു. കമ്പി വടികൊണ്ട് മര്‍ദിച്ചശേഷം മൃതദേഹം പുഴയില്‍ ഉപേക്ഷിക്കുകയായിരുന്നു. സംഘം ചേര്‍ന്നാണ് സൈനുല്‍ ആബിദിനെ മര്‍ദിച്ചത്. സൈനുല്‍ ആബിദ് ഒട്ടേറെ മോഷണ കേസുകളിലേയും ലഹരിക്കടത്തിലേയും പ്രതിയായിരുന്നു. പിടിക്കപ്പെട്ടവരും ക്രിമിനല്‍ കേസുകളില്‍ പ്രതികളായിട്ടുള്ളവരാണ്.