ഓപ്പറേഷന്‍ തൂഫാന്‍ യോഗത്തില്‍ പങ്കെടുത്തയാള്‍ കൊലപാതകശ്രമക്കേസില്‍ അറസ്റ്റില്‍; കെ. സുധാകരനെതിരെ വീണ്ടും വിമര്‍ശനം

കൊച്ചി: കോണ്‍ഗ്രസ് നേതാവ് കെ. സുധാകരന്‍ പങ്കെടുത്ത ഓപ്പറേഷന്‍ തൂഫാന്‍ യോഗത്തില്‍ പങ്കെടുത്തയാളെ കൊലപാതകശ്രമക്കേസില്‍ പൊലീസ് അറസ്റ്റ് ചെയ്തു. കൊച്ചങ്ങാടി സ്വദേശിയായ ഷിബു എന്ന മുഹമ്മദ് റിസയാണ് പിടിയിലായത്. മട്ടാഞ്ചേരിയിലെ ഒരു ബാറില്‍ മദ്യലഹരിയില്‍ യുവാവിനെ ക്രൂരമായി മര്‍ദിച്ച് കൊലപ്പെടുത്താന്‍ ശ്രമിച്ചെന്ന കേസിലാണ് അറസ്റ്റ്.

സംഭവത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിച്ചിരുന്നു. നിരവധി ക്രിമിനല്‍ കേസുകളില്‍ പ്രതിയായ ഷിബു, കെ. സുധാകരന്‍ പങ്കെടുത്ത ഓപ്പറേഷന്‍ തൂഫാന്‍ യോഗത്തില്‍ മുന്‍നിരയില്‍ ഉണ്ടായിരുന്നുവെന്ന ദൃശ്യങ്ങളും ഇതിനുമുമ്പ് പുറത്തുവന്നിരുന്നു.

ലഹരി മാഫിയക്കെതിരെ യുവാക്കളെ അണിനിരത്തുക എന്ന ലക്ഷ്യത്തോടെയാണ് ഓപ്പറേഷന്‍ തൂഫാന്‍ എന്ന പേരില്‍ യോഗം സംഘടിപ്പിച്ചതെന്ന് കെ. സുധാകരന്‍ വ്യക്തമാക്കിയിരുന്നു. എന്നാല്‍ യോഗത്തില്‍ പങ്കെടുത്തവരില്‍ നിരവധി ക്രിമിനല്‍ പശ്ചാത്തലമുള്ളവരുണ്ടെന്ന ആരോപണം അന്നുതന്നെ ഉയര്‍ന്നിരുന്നു.

കൊച്ചിയില്‍ നടന്ന യോഗത്തില്‍ കുപ്രസിദ്ധ ഗുണ്ടകളും വിവിധ ക്രിമിനല്‍ കേസുകളിലെ പ്രതികളും പങ്കെടുത്തതായി ആരോപണമുണ്ട്. കള്ളത്തോക്ക് വില്‍പ്പനശ്രമക്കേസിലെ പ്രതികളടക്കം യോഗത്തില്‍ ഉണ്ടായിരുന്നുവെന്നാണ് വിമര്‍ശനം. കൂടാതെ എകെജി സെന്റര്‍ ആക്രമണക്കേസിലെ രണ്ടാം പ്രതിയായ സുഹൈല്‍ ഷാജഹാനും യോഗത്തില്‍ പങ്കെടുത്തതായി ആരോപിക്കപ്പെടുന്നു.

ഓപ്പറേഷന്‍ തൂഫാന്‍ പദ്ധതിയുടെ ഭാഗമായി ചുറുചുറുക്കുള്ള യുവാക്കളെ ഉപയോഗിച്ച് ലഹരി മാഫിയയെ നേരിടുക എന്നതായിരുന്നു ലക്ഷ്യമെന്ന് കെ. സുധാകരന്‍ പറഞ്ഞിരുന്നു. എന്നാല്‍ യോഗത്തില്‍ പങ്കെടുത്തവരില്‍ ഒരാള്‍ ഇപ്പോള്‍ കൊലപാതകശ്രമക്കേസില്‍ അറസ്റ്റിലായതോടെ പദ്ധതിയെ ചൊല്ലിയുള്ള രാഷ്ട്രീയ വിവാദം വീണ്ടും ശക്തമായിരിക്കുകയാണ്.