തീപിടുത്തമെന്ന് അഭ്യൂഹം; ട്രെയിനില്‍ നിന്ന് ട്രാക്കിലേക്ക് ചാടി യാത്രക്കാര്‍, മധ്യപ്രദേശില്‍ ട്രെയിനിടിച്ച് 4 മരണം

മധ്യപ്രദേശ്:  മധ്യപ്രദേശിലെ മൊറീനയിലുണ്ടായ ദാരുണമായ തീവണ്ടി അപകടത്തില്‍ ഒരു കുട്ടിയുള്‍പ്പെടെ നാല് യാത്രക്കാര്‍ മരിച്ചു. മൂന്ന് സ്ത്രീകളും ഒരു കുട്ടിയുമാണ് മരണപ്പെട്ടത്. നോര്‍ത്ത് സെന്‍ട്രല്‍ റെയില്‍വേയിലെ ഝാന്‍സി ഡിവിഷനിലെ ഹേതംപൂര്‍ റെയില്‍വേ സ്റ്റേഷന് സമീപം വൈകുന്നേരം 4.15 ഓടെയാണ് ഈ ദൌര്‍ഭാഗ്യകരമായ സംഭവം നടന്നത്. തങ്ങള്‍ സഞ്ചരിച്ചിരുന്ന ഖജുരാഹോ-ഉദയ്പൂര്‍ ഇന്റര്‍സിറ്റി എക്‌സ്പ്രസ് ട്രെയിനില്‍ തീപിടിച്ചെന്ന വ്യാജ അഭ്യൂഹത്തെ തുടര്‍ന്ന് പരിഭ്രാന്തരായി ട്രാക്കിലേക്ക് ചാടിയ യാത്രക്കാരാണ് അപകടത്തില്‍പ്പെട്ടത്. ഇവരെ എതിര്‍ദിശയില്‍ നിന്നും വന്ന ഫിറോസ്പൂര്‍-സിയോണി പാതാല്‍ക്കോട്ട് എക്‌സ്പ്രസ് ഇടിക്കുകയായിരുന്നു. ട്രാക്കിലേക്ക് ചാടിയ നിരവധി യാത്രക്കാര്‍ക്ക് അപകടത്തില്‍ പരുക്കേറ്റിട്ടുമുണ്ട്.

ഖജുരാഹോ-ഉദയ്പൂര്‍ ഇന്റര്‍സിറ്റി എക്‌സ്പ്രസിലെ ഒരു ജനറല്‍ കോച്ചില്‍ തീപിടുത്തമുണ്ടായെന്ന് ആരോ നിലവിളിച്ചതോടെയാണ് സംഭവങ്ങളുടെ തുടക്കം. ഇതോടെ യാത്രക്കാര്‍ക്കിടയില്‍ കടുത്ത പരിഭ്രാന്തി പടരുകയും, ഹേതംപൂര്‍ - ധോല്‍പൂര്‍ സ്റ്റേഷനുകള്‍ക്കിടയില്‍ വെച്ച് ആരോ അടിയന്തര അലാറം ചെയിന്‍ വലിച്ച് ട്രെയിന്‍ നിര്‍ത്തുകയുമായിരുന്നു. ട്രെയിന്‍ നിന്ന ഉടന്‍ തന്നെ ജീവന്‍ രക്ഷിക്കാനായി യാത്രക്കാര്‍ കൂട്ടത്തോടെ പുറത്തെ ട്രാക്കിലേക്ക് ചാടിയിറങ്ങി. എന്നാല്‍ ഈ സമയം മറുപുറത്തെ ട്രാക്കിലൂടെ അതിവേഗത്തില്‍ പാതാല്‍ക്കോട്ട് എക്‌സ്പ്രസ് വരുന്നുണ്ടായിരുന്നു.

റെയില്‍വേ ലൈനിലേക്ക് ഇറങ്ങിയ യാത്രക്കാര്‍ക്ക് പാതല്‍കോട്ട് എക്‌സ്പ്രസ് വരുന്നത് മുന്‍കൂട്ടി കാണാന്‍ സാധിച്ചില്ലെന്ന് റെയില്‍വേ ഉദ്യോഗസ്ഥര്‍ വ്യക്തമാക്കി. അപകടം നടന്ന സ്ഥലത്തെ റെയില്‍വേ ട്രാക്കിന്റെ വളഞ്ഞ വിന്യാസമാണ് (Curved alignment) ഇതിന് കാരണമായത്. ട്രാക്കില്‍ ആളുകളെ കണ്ട് പാതാല്‍ക്കോട്ട് എക്‌സ്പ്രസിന്റെ ലോക്കോ പൈലറ്റ് അടിയന്തര ബ്രേക്കിംഗ് (Emergency braking) നടത്താന്‍ ശ്രമിച്ചെങ്കിലും കൃത്യസമയത്ത് ട്രെയിന്‍ നിര്‍ത്താന്‍ കഴിഞ്ഞില്ലെന്ന് റെയില്‍വേ അധികൃതര്‍ അറിയിച്ചു.

അതേസമയം, അപകടത്തിന് കാരണമായ ഇന്റര്‍സിറ്റി എക്‌സ്പ്രസ് ട്രെയിനില്‍ തീപിടുത്തമുണ്ടായെന്ന വാര്‍ത്തകള്‍ റെയില്‍വേ നിഷേധിച്ചു. പ്രാഥമിക അന്വേഷണത്തില്‍ ട്രെയിനില്‍ തീപിടുത്തമുണ്ടായതിന്റെ യാതൊരുവിധ തെളിവുകളും കണ്ടെത്തിയിട്ടില്ലെന്ന് ഝാന്‍സി റെയില്‍വേ ഡിവിഷന്‍ ഡിവിഷണല്‍ റെയില്‍വേ മാനേജര്‍ (DRM) അനിരുദ്ധ് കുമാര്‍ സ്ഥിരീകരിച്ചു. കേവലം വ്യാജ അഭ്യൂഹത്തെ തുടര്‍ന്നുണ്ടായ പരിഭ്രാന്തിയാണ് വലിയൊരു ദുരന്തത്തില്‍ കലാശിച്ചത്. സംഭവത്തില്‍ റെയില്‍വേ ഉന്നതതല അന്വേഷണം ആരംഭിച്ചിട്ടുണ്ട്.