കെഎസ്ആര്‍ടിസി ഓര്‍ഡിനറി ബസുകളിലെ സൗജന്യ യാത്ര ഇന്ന് മുതല്‍; മുഖ്യമന്ത്രി ഉദ്ഘാടനം ചെയ്യും

തിരുവനന്തപുരം:   കെഎസ്ആര്‍ടിസി ഓര്‍ഡിനറി ബസ്സുകളില്‍ വനിതകള്‍ക്കായുള്ള സൗജന്യ യാത്രാ പദ്ധതിക്ക് ഇന്ന് സംസ്ഥാനത്ത് തുടക്കമാവുകയാണ്. തിരുവനന്തപുരത്ത് നടക്കുന്ന ചടങ്ങില്‍ മുഖ്യമന്ത്രി വി. ഡി. സതീശന്‍ പദ്ധതിയുടെ സംസ്ഥാനതല ഉദ്ഘാടനം നിര്‍വഹിക്കും. സ്ത്രീ ശാക്തീകരണത്തിലും യാത്രാ സൗകര്യങ്ങളിലും വലിയൊരു ചുവടുവെപ്പായി മാറുന്ന ഈ പദ്ധതി ഇന്ന് രാവിലെ 9 മണി മുതലാണ് പൊതുജനങ്ങള്‍ക്ക് ലഭ്യമായി തുടങ്ങുക. ഉദ്ഘാടന സര്‍വീസിലെ ഡ്രൈവറും കണ്ടക്ടറും വനിതകളായിരിക്കും എന്നതാണ് ഈ ചടങ്ങിന്റെ പ്രധാന സവിശേഷത.

സാധാരണക്കാരായ സ്ത്രീകളെയും ദിവസവേതനക്കാരായ തൊഴിലാളികളെയും ലക്ഷ്യമിട്ടാണ് സര്‍ക്കാര്‍ ഈ പദ്ധതി നടപ്പിലാക്കുന്നത്. പ്രതിമാസം 600 രൂപ മുതല്‍ 3000 രൂപ വരെ യാത്രാച്ചെലവില്‍ ലാഭിക്കാന്‍ സാധിക്കുമെന്നത് സാധാരണ കുടുംബങ്ങള്‍ക്ക് വലിയ ആശ്വാസമാകും. പദ്ധതി പ്രകാരം യാത്ര ചെയ്യുന്നതിന് യാതൊരുവിധ തിരിച്ചറിയല്‍ കാര്‍ഡുകളും ആവശ്യമില്ല. എന്നാല്‍, യാത്ര പൂര്‍ണ്ണമായും സൗജന്യമാണെങ്കിലും ബസ്സില്‍ കയറുമ്പോള്‍ കണ്ടക്ടറില്‍ നിന്നും പൂജ്യം മൂല്യമുള്ള ടിക്കറ്റ് നിര്‍ബന്ധമായും വാങ്ങിയിരിക്കണം. സ്ത്രീകളുടെ കൂടെ യാത്ര ചെയ്യുന്ന 5 മുതല്‍ 11 വയസ്സ് വരെയുള്ള ആണ്‍കുട്ടികള്‍ക്ക് പകുതി നിരക്കിലുള്ള ഹാഫ് ടിക്കറ്റ് എടുക്കേണ്ടതാണ്.

വനിതകള്‍ക്ക് സൗജന്യ യാത്ര അനുവദിക്കുന്ന ഓര്‍ഡിനറി ബസ്സുകളെ എളുപ്പത്തില്‍ തിരിച്ചറിയുന്നതിനായി പ്രിയദര്‍ശിനി സ്റ്റിക്കറുകള്‍ ബസ്സുകളുടെ മുന്‍ഭാഗത്തും വശങ്ങളിലും പതിപ്പിച്ചിട്ടുണ്ട്. നിലവിലെ സാമ്പത്തിക സാഹചര്യങ്ങളില്‍ സര്‍ക്കാരിന് ഇതൊരു വലിയ അധിക ബാധ്യതയായി മാറുമെങ്കിലും, ജനക്ഷേമം മുന്‍നിര്‍ത്തി പദ്ധതി നടപ്പിലാക്കാന്‍ സര്‍ക്കാര്‍ കാണിച്ച ശക്തമായ ഇച്ഛാശക്തിയുടെ വിജയം കൂടിയാണ് ഇന്നത്തെ ദിവസം കുറിക്കുന്നത്.

അതേസമയം, പദ്ധതിയുടെ ഉദ്ഘാടന ചടങ്ങുകളില്‍ നിന്നും വിട്ടുനില്‍ക്കാനാണ് പ്രതിപക്ഷമായ സിപിഐഎം തീരുമാനിച്ചിരിക്കുന്നത്. തിരഞ്ഞെടുപ്പ് വേളയില്‍ നല്‍കിയ വാഗ്ദാനങ്ങള്‍ പൂര്‍ണ്ണമായി പാലിച്ചില്ലെന്നും എല്ലാ സര്‍വീസുകളിലേക്കും പദ്ധതി വ്യാപിപ്പിച്ചില്ലെന്നും ആരോപിച്ചാണ് ബഹിഷ്‌കരണം. ഇതിനൊപ്പം തന്നെ പദ്ധതിക്കെതിരെ സെക്രട്ടേറിയറ്റിന് മുന്നില്‍ പ്രതിഷേധം സംഘടിപ്പിക്കാന്‍ മെന്‍സ് അസോസിയേഷനും തീരുമാനിച്ചിട്ടുണ്ട്. ആണ്‍-പെണ്‍ വ്യത്യാസമില്ലാതെ എല്ലാ വിദ്യാര്‍ത്ഥികള്‍ക്കും 60 വയസ്സിന് മുകളിലുള്ള എല്ലാ പുരുഷന്മാര്‍ക്കും കെഎസ്ആര്‍ടിസിയില്‍ സൗജന്യ യാത്ര ഉറപ്പാക്കുക, പുരുഷന്മാര്‍ക്ക് സീറ്റ് സംവരണം ഏര്‍പ്പെടുത്തുക, ഉയര്‍ന്ന ശമ്പളം വാങ്ങുന്ന സ്ത്രീകളെ പദ്ധതിയില്‍ നിന്ന് ഒഴിവാക്കുക തുടങ്ങിയ നിരവധി ആവശ്യങ്ങളാണ് ഇവര്‍ മുന്നോട്ട് വെക്കുന്നത്. പദ്ധതി ആരംഭിക്കുന്ന ഇന്ന് മുന്‍ ഗതാഗത മന്ത്രി കെ. ബി. ഗണേഷ് കുമാറും തലസ്ഥാനത്ത് മാധ്യമങ്ങളെ കാണും. പദ്ധതിയുടെ പ്രായോഗികതയെക്കുറിച്ച് അദ്ദേഹം നേരത്തെ തന്നെ കടുത്ത വിമര്‍ശനങ്ങള്‍ ഉന്നയിച്ചിരുന്നു.