ആര്‍. സുഗതന് ബിജെപിയുടെ പൂര്‍ണ പിന്തുണ; നിയമപരമായ സംരക്ഷണം ഉറപ്പാക്കുമെന്ന് രാജീവ് ചന്ദ്രശേഖര്‍

തിരുവനന്തപുരം: ബിജെപി കൗണ്‍സിലര്‍ ആര്‍. സുഗതന് പാര്‍ട്ടിയുടെ നൂറ് ശതമാനം പിന്തുണയുണ്ടെന്ന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ വ്യക്തമാക്കി. സുഗതനെ പാര്‍ട്ടി ഒരിക്കലും കൈവിടില്ലെന്നും ആവശ്യമായ എല്ലാ നിയമപരമായ സംരക്ഷണവും ഉറപ്പാക്കുമെന്നും അദ്ദേഹം പറഞ്ഞു.

സുഗതനെ സംരക്ഷിക്കുന്നതിനായി പാര്‍ട്ടി ആവശ്യമായ എല്ലാ നടപടികളും സ്വീകരിക്കുമെന്നും അതില്‍ പൊലീസിനോ ആഭ്യന്തര മന്ത്രിക്കോ സംശയമുണ്ടാകേണ്ടതില്ലെന്നും രാജീവ് ചന്ദ്രശേഖര്‍ പറഞ്ഞു. അതേസമയം, അക്രമ രാഷ്ട്രീയത്തെ ബിജെപി പിന്തുണയ്ക്കില്ലെന്നും വാഹനങ്ങള്‍ തകര്‍ക്കുന്ന രീതി പാര്‍ട്ടിക്കില്ലെന്നും അദ്ദേഹം കൂട്ടിച്ചേര്‍ത്തു.

ഇ.ഡി. അന്വേഷണം നടക്കുമ്പോള്‍ സിപിഎം പ്രവര്‍ത്തകര്‍ വാഹനങ്ങള്‍ ആക്രമിക്കുന്നതായും അത് സിപിഎമ്മിന്റെ രാഷ്ട്രീയ സംസ്‌കാരമാണെന്നും അദ്ദേഹം ആരോപിച്ചു. ഗുജറാത്ത് മുഖ്യമന്ത്രിയായിരുന്ന കാലത്ത് നരേന്ദ്ര മോദിക്കെതിരെ കോണ്‍ഗ്രസ് നടത്തിയ ആക്രമണങ്ങളും അദ്ദേഹം വിമര്‍ശിച്ചു.

കേരളത്തിന്റെ സാമ്പത്തിക സ്ഥിതിയെയും അദ്ദേഹം വിമര്‍ശിച്ചു. കഴിഞ്ഞ പത്ത് വര്‍ഷത്തെ ഇടത് ഭരണവും അതിന് മുന്‍പുണ്ടായിരുന്ന കോണ്‍ഗ്രസ് ഭരണവും സംസ്ഥാനത്തിന്റെ സാമ്പത്തിക സ്ഥിതി മെച്ചപ്പെടുത്താന്‍ പരാജയപ്പെട്ടുവെന്ന് രാജീവ് ചന്ദ്രശേഖര്‍ ആരോപിച്ചു. നിലവില്‍ കോണ്‍ഗ്രസ് ഭരിക്കുന്ന സംസ്ഥാനങ്ങളിലെയും സാമ്പത്തിക സ്ഥിതി ആശങ്കാജനകമാണെന്നും അദ്ദേഹം പറഞ്ഞു.

കെഎസ്ആര്‍ടിസിയില്‍ സൗജന്യ യാത്ര ഉള്‍പ്പെടെയുള്ള തിരഞ്ഞെടുപ്പ് വാഗ്ദാനങ്ങള്‍ സാമ്പത്തിക യാഥാര്‍ഥ്യങ്ങള്‍ അവഗണിച്ചുള്ള രാഷ്ട്രീയ പ്രഖ്യാപനങ്ങളാണെന്നും അദ്ദേഹം വിമര്‍ശിച്ചു. അതേസമയം, നരേന്ദ്ര മോദിയുടെ നേതൃത്വത്തില്‍ കഴിഞ്ഞ 12 വര്‍ഷമായി രാജ്യം വികസനത്തിന്റെ പാതയിലാണെന്നും രാജ്യത്തിനായി അധ്വാനിക്കുന്ന പ്രധാനമന്ത്രിയാണ് മോദിയെന്നും രാജീവ് ചന്ദ്രശേഖര്‍ അഭിപ്രായപ്പെട്ടു.