കുവൈത്ത് എയര്‍വേയ്‌സ് എല്ലാ വിമാന സര്‍വീസുകളും താത്കാലികമായി നിര്‍ത്തിവെച്ചു

കുവൈത്ത് സിറ്റി: രാജ്യത്തെ നിലവിലെ സുരക്ഷാ സാഹചര്യങ്ങളുടെ പശ്ചാത്തലത്തില്‍ എല്ലാ വിമാന സര്‍വീസുകളും താത്കാലികമായി നിര്‍ത്തിവെച്ചതായി കുവൈത്ത് എയര്‍വേയ്‌സ് അറിയിച്ചു. പുതിയ അറിയിപ്പ് ഉണ്ടാകുന്നതുവരെ സര്‍വീസുകള്‍ പുനരാരംഭിക്കില്ലെന്നും യാത്രക്കാരുടെ സുരക്ഷ ഉറപ്പാക്കുന്നതിനായാണ് ഈ തീരുമാനമെന്നും കമ്പനി വ്യക്തമാക്കി.

വിമാന സര്‍വീസുകള്‍ പുനഃക്രമീകരിച്ച ശേഷം യാത്രക്കാരെ നേരിട്ട് ബന്ധപ്പെടുകയും പുതിയ യാത്രാസമയ വിവരങ്ങള്‍ അറിയിക്കുകയും ചെയ്യുമെന്ന് അധികൃതര്‍ അറിയിച്ചു. യാത്രക്കാര്‍ ആശങ്കപ്പെടേണ്ട സാഹചര്യമില്ലെന്നും ഏറ്റവും പുതിയ വിവരങ്ങള്‍ക്കായി കുവൈത്ത് എയര്‍വേയ്‌സിന്റെ ഔദ്യോഗിക വെബ്‌സൈറ്റും സാമൂഹ്യമാധ്യമ അക്കൗണ്ടുകളും നിരന്തരം പരിശോധിക്കണമെന്നും നിര്‍ദേശിച്ചു.

പ്രാദേശിക സുരക്ഷാ സാഹചര്യം സൂക്ഷ്മമായി നിരീക്ഷിച്ചുവരികയാണെന്നും സ്ഥിതിഗതികള്‍ സാധാരണ നിലയിലാകുന്ന മുറയ്ക്ക് സര്‍വീസുകള്‍ പുനരാരംഭിക്കുന്നതുമായി ബന്ധപ്പെട്ട അറിയിപ്പ് പുറത്തിറക്കുമെന്നും കമ്പനി വ്യക്തമാക്കി.

ഇതിനിടെ, കുവൈത്ത് അന്താരാഷ്ട്ര വിമാനത്താവളത്തിലെ ടെര്‍മിനല്‍-1 ലക്ഷ്യമാക്കി ഇന്ന് നടന്ന ആക്രമണത്തില്‍ കനത്ത നാശനഷ്ടമുണ്ടായതായി റിപ്പോര്‍ട്ടുകളുണ്ട്. ആക്രമണത്തില്‍ നിരവധി പേര്‍ക്ക് പരിക്കേറ്റതായും കുവൈത്ത് സൈനിക വൃത്തങ്ങള്‍ അറിയിച്ചു.

സംഭവത്തെ തുടര്‍ന്ന് കുവൈത്തില്‍ നിന്ന് പുറപ്പെടേണ്ട വിമാനങ്ങള്‍ റദ്ദാക്കുകയും അവിടെ ഇറങ്ങാനിരുന്ന നിരവധി വിമാനങ്ങള്‍ സമീപ രാജ്യങ്ങളിലെ മറ്റ് വിമാനത്താവളങ്ങളിലേക്ക് തിരിച്ചുവിടുകയും ചെയ്തതായി കുവൈത്തിലെ ജനറല്‍ സിവില്‍ ഏവിയേഷന്‍ അതോറിറ്റി അറിയിച്ചു.